Шығыс Қазақстан облысының әкімі Даниал Ахметов дүйсенбі, 7 қыркүйек күні Тарбағатай ауданында жұмыс сапарымен болды. Бұл туралы аймақ басшысы өзінің әлеуметтік желідегі жеке парақшасында жазды.
Ең алдымен облыс әкімі Даниал Кенжетайұлы ауданның жаңадан тағайындалған әкімі Асхат Сайдахметұлы Смаиловты аудан активіне таныстырды. Одан соң көп балалы отбасылардың үйлеріне барып, жағдайларын біліп, алтын құрсақты аналармен әңгімелесті. Осыдан он шақты жыл бұрын бұрынғы аурухана ғимараты пәтер ретінде лайықталып, үй алуға кезекте тұрған азаматтарға бөлініп берілген болатын. Тұрғындардың өтініші бойынша, жақын арада бұл ғимаратта күрделі жөндеу жұмыстары жүргізілетін болды. Барлық коммуникация желілері жөндеуді қажет ететінін, балалар үшін ауланы абаттандыру керектігін, осы мақсатта облыс бюджетінен 50 млн теңге бөлінетінін, жақын арада жөндеу жұмыстары басталатынын айтқан Даниал Кенжетайұлы бұл шаруаның барысын қатаң қадағалауды Тарбағатай ауданының әкімі Асхат Смаиловқа тапсырды. Абаттандыру бастамасын өздері де қызу қолдап, барынша көмек көрсетуге уәде берген тұрғындар облыс басшысына көп балалы отбасылардың жағдайына назар аударғаны үшін ризашылықтарын білдірді.
Бұдан соң облыс басшысы аудандық ауруханада болды. Аурухана жағдайымен жан-жақты танысқан Даниал Кенжетайұлы мұнда 29 оттегі концентраторы, өкпені жасанды желдететін 4 аппарат бар екенін, аурухана қызметкерлерінің қорғаныс құралдарымен жабдықталғанын, барлығында коронавирустың ықтимал жаңа толқынында дертпен күресетін науқастарды емдеу картасы мен алгоритмі барын ескеріп, аз уақытта оттегі станциясы орналастырылатынын мәлімдеді.
Осы жолғы сапарында облыс басшысы ауданда жаңадан салынып жатқан тұрғын үйлердің құрылысын аралап көріп, мұндағы жұмыс сапасына көңілі толатынын айтты. Болашақта көп балалы отбасылар қоныстанатын жақсы және жайлы баспаналардың төңірегінде қосалқы шаруашылықпен айналысуға қажетті жер учаскесінің барына да назар аударды.
Ақжар ауылындағы жөнделген мектепте барлық санитарлық нормаларды сақтай отырып, бастауыш сыныптар оқып жатыр. Мектепті аралап көрген облыс әкімі көзге түскен кемшіліктерді қысқа мерзімде жоюды мердігерлерге тапсырды.
Аймақ басшысы Ақжар ауылындағы ипподромға да барды. Мұндағы жұмыстың барысымен танысқан облыс әкімі Даниал Ахметов құрылыс жобасына түзету енгізуді тапсырды.
«Қазір Ақжар ауылында ипподром қалпына келтірілуде. Бұл спорт нысанын қысқы спорт түрлеріне де ыңғайлы ету қажет. Тұрғындарға шаңғы теуіп, бос уақытын тиімді өткізуге мүмкіндік беру керек. Ол үшін құрылысшылар жобаға түзетулер енгізіп, жылы павильонды қарастыруы тиіс»,- деп жазды инстаграмдағы жеке парақшасында Даниал Кенжетайұлы.
Жұмыс сапарын қорытындылаған облыс әкімі Даниал Ахметов аудан әкімі Асхат Смаиловқа жергілікті жерде әлеуметтік және экономикалық бағдарламаларды, оның ішінде «Жұмыспен қамту жол картасы», көп балалы және аз қамылған отбасыларды қолдау аясындағы жобаларды іске асыру бойынша бірқатар нақты міндеттер жүктеді.
Хамза СӘТИЕВ, «Семей таңы»{jcomments off}
