Бүгінгі таңда облысымыздағы дәрігерлер қауымы, ауруханалар жұқпалы індеттің болуы ықтимал екінші толқынына дайындалу үстінде. Қазіргі таңда осындау мақсатында аймағымыз бойынша 7069 төсек-орын дайындалған.
Елімізде, соның ішінде біздің өңірімізде де коронавирус індетінің болуы ықтимал екінші толқынына дайындық қарқынды түрде жүргізіліп жатыр. Ауруханаларда 7069 орын дайындалып, қосымша 10 сандық рентген аппараты, 158 ӨЖЖ аппараты және 1066 оттегі концентраторлары сатылып алынған.
— 7069 төсек-орынның 2038-і — инфекциялық, ал 2872-сі провизорлық бөлімшелерге қойылған. Сонымен қатар карантиндік аймаққа 2159 төсек орналастырылады. Қыркүйек айында жұқпалы аурулар орталығы бұрынғы медициналық жедел жәрдем ауруханасының ғимаратында жұмысын бастады.
Ондағы барлық төсек-орындар орталықтандырылған оттегі беру жүйесінің стационарларымен қамтамасыз етілген, — дейді бұл орайда ШҚО Денсаулық сақтау басқармасы басшысының орынбасары Райфа Сафиоллинова.
Сонымен қатар, өңірде тұмау және ЖРВИ маусымына орай, 88 359 вакцина сатылып алынып, қосымша ретінде тағы да 160 000 вакцина алу жоспарланған.
Айта кетейік, бұл ретте өткен жылдың қазан айынан бері аймақта жалпы саны 60 455 адам тұмау және ЖРВИ ауруларына шалдыққан. Мамандардың айтуынша, негізгі өсім осы жылдың қаңтар және ақпан айларында тіркеліпті. Дәрігерлер қауымы биылғы коронавирус індетінің қаупін ескеріп, індеттің дендемеуі үшін тұмаудың алдын алуға кең көлемде ден қоюда. Сол себептен де биылғы жылы сатылып алынған вакцина көлемі өткен жылмен салыстырғанда екі есеге артып отыр.
Жұқпалы індеттің екінші толқынына даярлық шаралары қазіргі таңда Семей қаласы бойынша да тыңғылықты пысықталу үстінде. Аталмыш бағыттағы шаралардың барлығы облыстық денсаулық сақтау басқармасы мен жергілікті биліктің назарында тұр.
Өз тілшіміз{jcomments off}
