{jcomments off}
Аймағымызда «Жұмыспен қамту жол картасы» мемлекеттік бағдарламасы аясында 765 жоба аяқталды. Аталған бағдарлама шеңберінде облыста 20 мыңнан астам жұмыс орны ашылған. Бүгінде облыс көлемінде ғимараттарды қайта жөндеу, жаңа нысандар салу, көшелерді абаттандыру жұмыстары қарқынды жүріп жатыр. Соның нәтижесінде аймақтың келбеті ажарланып, көркейіп келеді. Әлемдегі жағдай барлық елдердің экономикасын баяулатқанына қарамастан, биыл Шығыс Қазақстан облысында 819 жоба қолға алынып, оның 787-сін осы жылдың 1 желтоқсанына дейін аяқтау жоспарланып отыр.
Бұл жобалар, қалалармен қатар, аудандар мен шалғайдағы ауылдардың дамуына да оң әсер етеді. Жаңа ғимарат салынып жатқан жерде тұрғындар үшін жайлы және заманауи орта қалыптасса, еңбек етуге ниетті азаматтар үшін жаңа жұмыс көздері көбейеді.
— Қараша айында «Жұмыспен қамту жол картасы» бағдарламасы бойынша 27 жобаны аяқтау қажет. Алты ірі жоба, атап айтқанда Өскемен қаласындағы әуежай, Үржар ауылындағы аэровокзалдың ұшу-қону жолағын қайта жаңарту, Семейде Қарағайлы шағын ауданына, Өскемендегі Есенберлин даңғылынан Жібек жолы көшесіне және Қазыбек би даңғылынан Алматы трассасына дейінгі аралықта инженерлік-коммуникациялық инфрақұрылымды салу, сондай-ақ Онкология және хирургия орталығының реанимация, маммология және гинекология бөлімшелерінің операциялық блогын жаңғырту сияқты жобалар келесі жылға қалдырылады,– деді аймақ басшысы Даниал Ахметов.
Айта кетейік, облыста «Жұмыспен қамту жол картасы» аясында 247 шақырым жол жөнделген. 14 ауруханада және 262 мектепте күрделі жөндеу жүргізілген. Барлық негізгі жобалар, оның ішінде кварталішілік су құбыры тораптары мен кәріздерінің, сондай-ақ 19 шағын ауданның инженерлік-коммуникациялық инфрақұрылымының құрылысы бітті. Семей қаласындағы үлкен көпірді жарықтандыру және Абай ауданы Қарауыл ауылындағы Ұлы ақын атындағы саябақтың жобасы аяқталуда.
Сонымен қатар 2024 жылға қарай ШҚО халқы орталықтандырылған ауыз сумен толықтай қамтамасыз етілмек.
— Бұл — біздің алдымызда тұрған стратегиялық міндеттердің бірі. Бүгінде облыста елді мекендерге тиісті инфрақұрылымды жеткізу бойынша нақты жоспарлар әзірленген. Жалпы, қазіргі уақытта өңір тұрғындарының 90,5%-ы орталықтандырылған су беру жүйесімен жабдықталған, оның ішінде 683 елді мекеннің 462-сі бар.
Жыл басынан бері тағы 139 жоба іске қосылды, оның 92-сі желтоқсан айының соңына дейін мәресіне жетуі керек. 51 ауылда блокты-модульдік станция орнатылады. Жалпы, биыл ауылдық елді мекендердің 20 мыңнан астам тұрғынын таза ауыз сумен қамтамасыз етеміз,- деді облыс басшысы аймағымыздың ауылдық елді мекендерін сумен жабдықтау мәселелері және 2021 жылға арналған жоспарлы жобалар барысы талқыланған жиында.
ШҚО әкімдігі мәліметі бойынша әзірленді
