Келер жылы Семей қаласының Ұшақтар шағын ауданында 200 үйдің, Комсомол кентінде 143 үйдің құрылысы басталады. Бұл туралы облыс әкімі Даниал Ахметов Instagram әлеуметтік желісіндегі парақшасында жазды.
Бұл баспаналар жеке инвесторлар есебінен салынбақ. Ниет білдірушілер тұрғын үйлерді сатып алуына немесе екінші деңгейдегі банктер арқылы ипотекаға рәсімдеуіне болады. Осындай тұрғын үй құрылысы Өскемендегі 20, 22 және 28 тұрғын аудандарда да жалғасатын болады. Жалпы, облыста алдағы уақытта инженерлік-коммуникациялық инфрақұрылымы жүргізілген жер учаскелерін жеке тұрғын үй құрылысы үшін беру жұмысы қайта жаңғыртылады.
«Жұмыспен қамту жол картасы» аясында аталған шағын аудандарды абаттандыруға байланысты жобаларды дайындау тапсырылды. Айта кету керек, биыл осы бағдарлама шеңберінде 819 әлеуметтік маңызды инфрақұрылымдық жоба іске асырылуда, оның 787-сін осы жылдың 1 желтоқсанына дейін аяқтау жоспарланып отыр. 20 мыңнан астам жұмыс орны ашылды. Жол картасы — халықты жұмыспен қамту құралы ғана емес, өңірдің экономикасының өсуіне жол ашатын мүмкіндік. Бағдарлама бойынша облысымызда 247 шақырым жол жөнделді, 14 ауруханада және 262 мектепте күрделі жөндеу жүргізілді.{jcomments off}
«СТ»-ақпарат
