Семей қаласында бүгінгі күні «Таксомоторный парк» ЖШС, «Семей» Автобус паркі» ЖШС және «Semey Bus» ЖШС автобус парктерінен 212 қоғамдық көлік 35 бағыт бойынша желіге шығып, өз жұмысын әдеттегі режим бойынша жалғастыруда.
Көктемде елімізде шектеу шаралары енгізілген уақытта қоғамдық көліктердің саны азайып, тек кезекші автобустар жұмыс істеген еді. Қазіргі уақытта қоғамдық көліктердің жүру кестесі бұрынғы қалпына келтірілді. Автобустар сағат 21:30-ға дейін қатынайды.
Семей қалалық тауарлар мен көрсетілетін қызметтердің сапасы мен қауіпсіздігін бақылау комитеті басқармасының бас маманы Серікболсын Назарбековтің айтуынша, автобустарға соңғы аялдамаларда санитарлық-дезинфекциялық жұмыстар жүргізіліп, желдетіледі. Басқарма тарапынан қоғамдық көліктерге рейд өткізіліп, санитарлық талаптардың сақталуы жиі тексеріледі. Десе де бүгінгі күні автобустардағы жолаушылар саны бекітілген ережеге сай келмейді. Бұған себеп – желідегі автобустар санының аздығы. ШҚО бас санитарлық дәрігерінің қаулысы бойынша, қоғамдық көліктердегі жолаушылар саны орын санына сәйкес болуы керек.
— Бұл жерде жолаушыларды айыптауға болмайды. Тасымалдаушы мекеме ережелерді елемей отыр. Басқарма тарапынан жауапты органға хат жазылды, — дейді Семей қалалық тауарлар мен көрсетілетін қызметтердің сапасы мен қауіпсіздігін бақылау комитеті басқармасының бас маманы Серікболсын Назарбеков.
Облыстың бас санитарлық дәрігерінің қаулысына сәйкес, автобус жүргізушілері мен кондукторлары және барлық жолаушылар маскалық режимді қатаң сақтауға міндетті. Олай болмаған жағдайда, 30 айлық есептік көрсеткіш, яғни 80 мың теңге көлемінде айыппұл салынады. Осы уақытқа дейін, қаладағы мониторингтік топ маска режимин сақтамаған 100-ден астам адамға айыппұл салған.
23 қаңтардағы жағдай бойынша Қазақстанда 126 182 адам коронавирус дертін жұқтырған. Әсіресе Нұр-Сұлтан, Алматы қалалары мен Шығыс Қазақстан облысы жұқтырушылар саны жөнінен көш бастап тұр. Тұрғындардан маскалық режимді, санитарлық-гигиеналық ережелерді қатаң сақатуды сұраймыз.
Жадыра ТӨЛЕГЕНҚЫЗЫ, «Семей таңы»{jcomments off}
