ҚР Президенті Қасым-Жомарт Тоқаев 21 қазанда Парламент Мәжілісі депутаттарының кезекті сайлауын тағайындау туралы Жарлыққа қол қойды. Жарлыққа сәйкес, Қазақстан Республикасы Парламенті Мәжілісі депутаттарының кезекті сайлауы 2021 жылғы 10 қаңтарда өтеді.
Семей округінің қалалық сайлау комиссиясы, Орталық сайлау комиссиясының күнтізбелік жоспарына сай, сайлауға дайындық жұмыстарымен айналысуда. Қазіргі күні Семей округінде 149 учаскелік сайлау комиссиясы бар. Әр учаскелік сайлау комиссиясының құрамында 5, 7 немесе 9 адамнан құралған комиссия бекітілген.
Қалалық сайлау комиссиясы төрағасының айтуынша, биылғы сайлау жүйесінің ерекшелігі — пропорционалды жүйеде өтуі. Яғни Қазақстанда тіркелген барлық партиялар сайлауға қатысуға құқылы.
— Мәжіліс сайлауына қатысатын 6 саяси партияның өкілдері біздің қалада да тіркелген. Атап айтатын болсақ: «Adal» партиясы («Бірлік» партиясы), «Ақжол» партиясы, «Ауыл» партиясы, Жалпыұлттық социал-демократиялық партиясы, Халық партиясы және «Nur Otan» партиясы. Осы уақытқа дейін алты партияның төртеуі қалалық мәслихат депутаттығына үміткерлерін ұсынды: «Adal» партиясы — 3 адам, «Ақжол» партиясы — 12 адам, «Ауыл» партиясы 4 адам, «Nur Otan» партиясы — 37 адам. Жалпыұлттық социал-демократиялық партиясы мен Халық партиясынан жауап күтіп отырмыз. Облыстық мәслихат депутаттығына үміткерлерді облыстық, Мәжіліс депутаттығына үміткерлерді Орталық сайлау комиссиясы тіркейді, — дейді Зейнолла Тоқаев.
Сайлау кезінде әр сайлаушыға 3 бюллетень беріледі. Яғни сайлаушылар қалалық және облыстық мәслихатқа, сондай-ақ Мәжіліске үміткер саяси партияларға дауыс бере алады. Бұл орайда дауыс жеке адамға емес, саяси партияға берілетінін атап өткен жөн.
Партиялардың үгіт-насихат жұмыстары 10 желтоқсаннан басталады. Бүгінгі күні үгіт-насихат материалдарын жариялау, ілу орындары, сайлаушылармен кездесу ғимараттары белгіленді. Үгіт-насихат жұмыстары 2021 жылдың 9 қаңтарында сағат 00:00-де аяқталады. – Сайлау науқаны басталғанда сайлаушылардан сайлау учаскесі жайлы сұрақтар туындауы мүмкін. Мәселен, кейбір қала тұрғындары мекенжайының ауысуына байланысты, жақын орналасқан сайлау учаскесінде дауыс бергісі келеді. Бірақ ,заң бойынша, бұл мүмкін емес. Дауыс тұрғылықты мекенжай бойынша беріледі. Егер сайлаушылар тарапынан қандай да бір сауалдар туындаса, Call-орталығына 52-03-71 телефон нөмірі бойынша хабарласуға болады. 21 желтоқсан күні қала әкімі әр учаскелік сайлау комиссиясындағы сайлаушылар тізіме қол қояды. Осы кезден бастап әр сайлаушы сайлау комиссиясына барып өзінің тізімде бар-жоғын біле алады. Егер сайлаушы сайлау күні іссапарға байланысты қаладан тыс жерге кететін болса, алдын ала өтініш беруі керек,- дейді қалалық сайлау комиссиясының төрағасы.
Сайлау күні әр саяси партия сайлау учаскелеріне 3 бақылаушыдан қоюға құқылы. Сонымен қатар шетелдік бақылаушылар да болады. Қоғамдық ұйым мүшелері мен БАҚ өкілдері де бақылаушы ретінде шақырылады. Әр сайлау комиссиясындағы қоғамдық тәртіптің сақталуын ішкі істер басқармасынан бөлінген екі қызметкер қадағалайтын болады.
— Миллионға жуық бюллетень әр сайлау учаскесіне бөлінеді. Бюллетень ерекше құжат түріне жататындықтан, саны мен сапасы өзгеріссіз болуы керек. Өткен сайлауда қаламыздағы сайлау учаскелерінде шетелден келген бақылаушылар көп болды. Биыл қанша бақылаушы болатыны әзірге белгісіз. ШҚО бас санитар дәрігерінің шешімін күтеміз. Комиссия мүшелері тиісті санитарлық-гигиеналық заттармен қамтамасыз етіліп, сайлаушыларға бір реттік қалам беріледі. Індетке байланысты, биыл әр учаскедегі сайлаушылар саны азайтылды. Сондықтан сайлаушылардың алдын ала жоғарыда айтып кеткен Call-орталыққа хабарласқандары жөн,- дейді З.Тоқаев.
Сайлау учаскелерінде мүмкіндігі шектеулі жандар үшін де тиісті жағдайлар қарастырылып, арнайы белгілер орнатылыпты. Дегенмен 149 сайлау учаскесінің 30-ы екінші қабатта орналасқандықтан, қалалық сайлау комиссиясының төрағасы әлі де қарастыратын тұстар бар екенін, сайлау учаскесіне келе алмайтын қарттар мен мүмкіндігі шектеулі жандардың саны анықталып жатқанын жеткізді. Олар үйінде дауыс беретін болады.
Жадыра ТӨЛЕГЕНҚЫЗЫ, «Семей таңы»{jcomments off}
