Өткен аптада Семейге жұмыс сапарымен ШҚО әкімінің орынбасары Ержан Нұрбаев келді. Ержан Нұрбаев болашақта Қазақстандағы ең қуатты және заманауи зауыт болатын май дақылдарын өңдеуге арналған майды экстракциялау зауытына барды.
Зауыттың күнбағыс, рапс, соя, зығыр дәндерін қайта өңдеуде Орталық Азияда флагман болуға мүмкіндігі бар. Зауыттың қуаттылығына тоқталатын болсақ, жылына 150 000 тонна өсімдік майын, 120 000 тонна күнбағыс ұнтағын, 50 000 тонна күнбағыс қабығынан отын түйіршіктерін және 1 300 тонна фосфатидті концентрат шығаратын болады.
Зауыт құрылысын аяқтау және оны іске қосу осы айға жоспарлануда. Сондай-ақ, зауытпен қатар, Шығыс Қазақстан облысындағы ең үлкен және заманауи элеватор құрылысы жүргізілуде. Кәсіпорынның бос өндірістік алаңдарының сақтау көлемі 60 000 тонна астыққа есептелген. Бұл жоба келісілген мерзімде аяқталып, Қазақстандағы экологиялық таза өнімдерді шығаратын әлемдік деңгейдегі зауыт болады деп сеніммен айта аламыз. Себебі — құрылыс бойынша бас мердігер «Азия» ЖШС осыған дейін де бірнеше жобаны сәтті жүзеге асырған.
Орталық Азияда осындай жоғары сапалы күнбағыс майын шығаратын зауыт жоқ екенін атап өткен жөн. Жобаның басты мақсаты — жоғары технологиялық, максималды автоматтандырылған май дақылдарын қайта өңдеу зауытын құру. «Qazaq Astyq Group» ЖШС “Elica”, “Maysilo”, “Tan” әлемге әйгілі брендтерінен соңғы үлгідегі технологиялық қондырғыларды сатып алды. Кәсіпорында химиялық және дайын өнімдердің әлемдік стандартқа сәйкестігіне қатаң бақылау жүргізетін өз зертханасы болады.
— Зауыт құрылысы былтырғы жылғы сәуірде басталған. Қазіргі уақытта жұмыстың 70%-ы аяқталды. Электр және автоматика жұмыстарын аяқтау ғана қалды. 2021 жылғы мамырда жобалық қуаттылыққа шығамыз деп үміттенеміз. Бүгін май шығару цехының жұмысы аяқталды, экстракция 90% аяқталды, элеваторды біз 15 желтоқсанда іске қосамыз. Зауытта 250 адам жұмыс істейтін болады. Біз штатты құрып қойдық, қазір 150 адам жұмыс істеуде. Ақпан айында штат толықтай қалыптасады деп ойлаймын. Біз аграрлық шаруашылықтармен байланыс орнатудамыз. Енді олар өнімдерін өткізетіндеріне толықтай сенімді. Сондай-ақ біз оларға жоғары көлемде өнім алу үшін егін егу жұмыстарын жүргізуге кеңестер берудеміз. Зауытқа қандай шикізат әкелінетіні біз үшін өте маңызды. Француздық компаниямен ШҚО үшін дақылдар өндіру туралы келіссөздер жүргізудеміз. Әкімшіліктен дақылдар қорына арналған жер бөлінген, – дейді зауыт директоры Еркінбек Дускужанов.
Атқарылған жұмысты Ержан Нұрбаев та жоғары бағалады.
— Мен өте жақсы әсер алдым. Маңызды нысан, көп жұмыс атқарылғаны көрініп тұр. Мұндай ірі жобалар облысымызға қажет деп ойламын. Осындай қуаттылықтағы зауыт құрылысы Предгорный кентінде де жүргізілуде. Бұл екі зауыт іске қосылған кезде біздің барлық шикізатымызды өңдейтін болады. Сонда біз өз өнімдерімізді ешқайда сатпаймыз, бұл, менің ойымша, ең дұрыс және ақылға қонымды шешім. Алғашқы кезде жұмыс көп қаржыландыруды қажет етеді, содан кейін ғана ол өз нәтижесін береді, ең бастысы, ауылшаруашылық тауар өндірушілері өз өнімдерінің сапасын арттыруға тырысады, сәйкесінше, бәсекелестік пайда болады, бағасы өседі және импорт алмасу болады. Бүгінгі күні ШҚО-да Қазақстан бойынша күнбағыстың 66%-ы өндіріледі. Аталған екі зауыт іске қосылғанда жалпы өндірістің көлемі Қазақстан бойынша 50% болады. Үлкен жұмыс атқарылған, жақын уақытта зауыт іске қосылады. Бұл қала құраушы кәсіпорын болады, қосымша жұмыс орындары ашылады, – деді облыс әкімінің орынбасары.
Бүгінгі күні Шығыс Қазақстан облысы негізгі күнбағыс тұқымын өндіруші және өсімдік майын шығарушыларға негізгі шикізат жеткізуші болып табылатынын айтып өткен жөн. Облыс Қазақстан бойынша жалпы тазартылмаған май көлемінің 80%-ын және тазартылған майдың 50%-ын өндіреді. Жыл сайын облысымызда 380 мың гектар жерге күнбағыс егіледі. Аймағымыз сонымен бірге тікелей Ресей Федерациясының ірі аграрлық аймағы – Алтай өлкесімен шекараласады.
Семей қаласының ақпараттық орталығы{jcomments off}
