Қазақ инновациялық гуманитарлық-заң университетінде оқу орнының үздік студенттері ҚР Тұңғыш Президенті – Елбасы кітапханасының директоры, саяси ғылымдардың докторы, профессор Әмірхан Рахымжановпен онлайн – кездесу өтті.
Елбасының тәуелсіз Қазақстанның қалыптасуы мен дамуына қосқан үлесін зерделеу, жастарды Елбасы кітапханасымен таныстыру, сондай-ақ олардың патриоттық сезімдерін дамыту мақсатында ұйымдастырылған кездесуде көрермендерге ҚР Тұңғыш Президенті Нұрсұлтан Әбішұлы Назарбаевтың өмірбаяны жайлы деректі фильм көрсетіліп, Елбасының балалық шағынан сыр шертетін фотосуреттерден әзірленген арнайы сюжет ұсынылды. Студенттерге Елбасы кітапханасына онлайн – экскурсия ұйымдастырылып, ондағы құнды жәдігерлер таныстырылды.
Онлайн шарада студенттер Елбасы кітапханасының директоры Әмірхан Рахымжановқа сұрақтарын қойып, өз ұсыныстарын да айтты. Жастардың ойларын орталық басшысы өз тарапынан мақұлдап, студенттерді елдегі эпидемиологиялық ахуал түзелген соң астанаға келіп, Тұңғыш Президент кітапханасына экскурсия жасауға шақырды. Сонымен қатар Елбасының 100-ден аса кітабын оқу орнының студенттері мен ұжымына тарту ететінін де жеткізіп, Қазақ инновациялық гуманитарлық-заң университеті ұжымына кітапханамен меморандумға отыруға ұсыныс жасады.
– Менің сіздермен меморандумға отырсақ деген ұсынысым бар. Меморандум аясында
халықаралық конференциялар, семинар, тренингтер өткізсек. Біз барып сіздерге барып, студенттерге офлайн дәрістер оқысақ. Сіздермен бірге Семей қаласындағы мектеп оқушыларымен кездесу өткізер едік. Сондай–ақ 700-ден астам экспонаттарды апарып, сіздердің университеттеріңізде көрме ұйымдастыруға үлкен мүмкіндігіміз бар. Елбасының қаламсаптары мен кітаптарын, шет елдерден келген сый-сияпаттарын, 50-ден астам мықты мемлекеттердің корольдерінің, императорларының қолынан алған марапат, ордендерін сол көрмеде көрсете аламыз, – деп өз ойын білдірді кездесу барысында ҚР Тұңғыш Президенті – Елбасы кітапханасының директоры Әмірхан Мұратбекұлы.
Нұр-Сұлтан қаласының сәулетті нысандарының бірі – самғау көкке ұмтылған көз жанары іспеттес бірегей орталық осыдан тура 7 жыл бұрын, 2013 жылы британдық танымал сәулетші Норман Фостердің жобасы бойынша бой көтерген. Жалпы аумағы 28 мың шаршы метрді құрайтын ғимарат бүгінде ел астанасының мақтанышына айналып отыр.
Абылай МАҚСҰТБЕК, «Семей таңы»{jcomments off}
