Елбасының бұқаралық ақпарат құралдары арасындағы сыйлығының лауреаты болу бақыты бұйырған аймақтағы санаулы басылымдардың бірі «Семей таңы» газеті болса, осындай құрметке ие болған журналистердің бірі — РИЗА МОЛДАШЕВА. Тәуелсіздіктің 30 жылдығы қарсаңында Риза Асанқызынан осы кездесулер жайлы газет оқырмандарына әңгімелеп беруді сұраған едік.
— Риза Асанқызы, Қазақстанның Тұңғыш Президенті Нұрсұлтан Әбішұлы Назарбаевпен кездесу кез келгеннің еншісіне бұйыра бермейтін бақыт шығар. Алматы немесе бас қала Нұр-Сұлтандағы республикалық басылымдардың бірі емес, аймақтық газеттің Елбасының жоғары марапатына ие болуын басылым қызметіне берілген жоғары баға деп білемін.
— Бүгінгі «Семей таңы» газетінің тарихы 1917 жылы Алаш ардақтыларының үнін халқына жеткізген алғашқы қазақ басылымдарының бірі «Сарыарқа» газетінен басталады. «Nur Otan» партиясының «Нұр Сұңқар», тағы да басқа сыйлықтардың жүлдегері болғанымызбен, Елбасының өзінің қолынан алған марапаттың жөні бөлек, бұл басылым тарихындағы және өзімнің журналистік қызметімдегі жұлдызды сәттердің бірі деп бағалаймын.
Сонымен, 2005 жылы журналистердің кәсіби мерекесі қарсаңында Мемлекет басшысының Жарлығымен БАҚ өкілдері арасындағы сыйлықтың лауреаттарының бірі болдық. Марапат Ақордада тапсырылды. Сол сапарымда ең бірінші Тәуелсіз Қазақстанның тағдырын шешетін барлық тарихи сәттерге куә болған киелі шаңырақ – Ақорданың салтанаты ерекше әсер қалдырған еді. Сыйлық тапсыру рәсімі Ақордадағы Мәрмәр залында өтті. Марапат алу кезегі келіп, менің атым аталғанда көпшілік арасында отырған есімі республикаға танымал ҚР мемлекет қайраткері, жерлесіміз Мұхтар Құл–Мұхамедтің (ол кезде ҚР Президентінің кеңесшісі және Баспасөз хатшысы қызметін атқаратын): «Жаса, Семей!»- деген дауысын естіген Нұрсұлтан Әбішұлы жымиып күлді де, қолымды алып тұрып: — Семейден келдің бе? Ол жақтағы ел-жұртқа сәлем айт! – деді.
Мемлекет басшысымен кездесуде өңі сұсты саясаткер, ресми басшыны емес, керісінше, жылы жүзді сымбатты тұлғаны көрген едім. Талай алпауыт елдерге ұлтымызды мойындатқан, шекарамызды шегендеп, тәуелсіздігімізді тұғырлы ету жолында басқа мемлекеттерге үлгі болған, әлемдік саясатта аралары суық елдердің арасын жақындатқан білікті бітімгер, қазақ деген халықтың кемеңгер ұлының қолын алуды өзім бақыт деп бағалаған едім.
— Екінші рет Елбасымен тағы кездестіңіз ғой?..
— Иә, сөзімнің басында айтып кеттім ғой, Елбасымен екі рет кездескенімді. Қарусыздандыру және ядролық сынақты тоқтату тақырыбын белсенді көрсеткені үшін, 2009 жылы «Семей таңы» газеті Қазақстан Республикасы Президентінің бұқаралық ақпарат құралдары саласындағы грантының иегері болды.
Өздеріңіз де білесіздер, Нұрсұлтан Назарбаевтың Жарлығымен 1991 жылы Семей полигоны жабылды. Қазақ елінің Ұлт Көшбасшысын бүкіл әлем ең бірінші бейбітшілік жаршысы ретінде таныды. Ендеше, Семей сынақ полигонын жабу тақырыбы Елбасына етене жақын болатын.
2007 жылдың маусым айының 19 күні Елбасы кезекті сапарымен Семейге келді. Қаладағы Абай атындағы музыкалық — драма театрының көрермен залы лық толы үлкен жиын болды. Нұрсұлтан Әбішұлы мінберден:
— Семипалатинск атауын Семей деп өзгертсек қалай болады?..- деп көпшілікке қарады. Бұл ұсынысты залға жиналған қауым ду қол соғып, қошемет көрсете қолдаған еді.
Семейдің тарихын 1718 жылы тұрғызылған әскери бекініспен байланыстырып, 2018 жылы қаланың 300 жылдығын тойлауға талпынғандарды семейлік бір топ зиялы қауым Ертіс бойындағы қала мәдениетінің тарихы 1000 жылдан артық деген тұжырымдамамен тоқтатқаны белгілі. Түсіне білген адамға Елбасының Семипалатинск атауын СЕМЕЙ деп ауыстыру жайлы ұсынысы — жай ғана айтыла салған сөз емес, үлкен саясат!
— Рақмет!
Сұхбаттасқан Роза МАУЫЛХАНҚЫЗЫ{jcomments off}
