Өткен аптада Семей қаласы әкімдігі жанындағы жастар ісі жөніндегі кеңестің кезекті отырысы өтті. Семей қаласы әкімінің орынбасары Зәуреш Исабаеваның төрағалығымен өткен жиынға жастар ұйымдарының және оқу орындарының жетекшілері, құқық қорғау органдарының өкілдері қатысты.
Отырыс барысында алдымен жастарды жұмыспен қамту мәселесі талқыланды. Аталмыш тақырып бойынша “Семей қаласы әлеуметтік бағдарламалар және жұмыспен қамту бөлімі” басшысының орынбасары Жанат Нікүшев баяндама жасап, жастарды жұмыспен қамтуға бағытталған бағдарламалар аясында өткен жылы атқарылған шараларға тоқталып өтті. Былтыр «Жастар тәжірибесі» бойынша 778 жас маман даярланып, тәжірибе мерзімі аяқталған кезде олардың 239-ы, яғни, 31 пайызы тәжірибеден өткен мекемелерде жұмысқа орналасқан. Одан кейін жүргізілген мониторинг осы бағдарлама аясында білім алған жастардың төрттен үш бөлігі тұрақты жұмысқа тұрғандығын анықтаған. Сонымен қатар, Жанат Нығметұлы кәсіби білім берудің қарқын алып келе жатқанын тілге тиек етті. 2013 жылы техникалық, құрылыс және қызмет көрсету салалары бойынша 357 жас даярлық курстарынан өтіп, олардың 76 пайызы тұрақты жұмысқа ораналасқан. Бұдан бөлек, әлеуметтік жұмыс орындары бағдарламасына қатысқан 326 адамның 60 пайызы тұрақты жұмысқа кірген екен. Өткізілген арнайы жәрмеңкелердің нәтижесінде 37 мүмкіндігі шектеулі жастар бос тұрған жұмыс орындарына орналасқан. Жанат Нікүшевтің айтуынша, 2013 жылы орталыққа көмек сұрай келген жастардың 70 пайызы жұмыспен қамтылған екен.
Екінші кезекте талқыланған мәселе жастар арасындағы құқықбұзушылықтың алдын алу және ескерту жұмыстарына қатысты болды. Бұл орайда қалалық ішкі істер басқармасы басшысының орынбасары Мақсат Зекенов жиналғандарға ақпарат берді. Оның айтуынша, 2013 жылы жүргізілген жедел алдын алу шараларының нәтиже-сінде 4 141 жас арнайы тіркеуге алынған. Бұл 2012 жылғымен салыстырғанда 64,3 пайызға артық. Сондай-ақ, кәмелетке толмағандардың түнгі уақытта көңіл көтеру мекемелерінде жүруіне қатысты 1964 дерек тіркелген. Бұл көрсеткіш те 2012 жылғымен салыстырғанда 28,8 пайызға артып отыр. Жалпы алғанда Мақсат Зекенов жастар арасында құқықбұзушылықтың көбейгенін айтты. Сонымен қатар, көбіне тәртіп бұзатын колледждер мен лицейлердің оқушылары екен. Осы орайда ішкі істер басқармасы басшысының орынбасары студенттік отрядтардың санын көбейтіп, олармен тығыз жұмыс жасаудың қажеттігін атап өтті. Қазіргі таңда мұндай ұйымдардың саны алтау болса, құрамындағы жастардың жалпы есебі 68 адам. Мақсат Зекенов жуық арада қаладағы оқу орындарының барлығында осындай отрядтар құрылып, олардың мүшелеріне арнайы куәліктер берілетінін де жеткізді.
{jcomments on}
Сондай-ақ, жиын барысында жастардың белсенділігін арттырып, олардың идеяларын жүзеге асыру үшін оқу орындарындағы жастар ісі жөніндегі комитеттердің жұмысын дамыта түсу керектігі де сөз болды. Себебі, білім ордаларындағы басқа студенттердің басын қосып, ортақ мақсатқа жұмылдыратын да жастар комитеті. Бұл тұрғыда сөз сөйлеген Семей Мемлекеттік медициналық университеті жастар ісі жөніндегі комитетінің төрайымы Шынар Хасенова аталмыш ұйымның жұмысы жайлы айтып, комитет мүшелерінің қатысуымен көптеген халықаралық бағдарламалардың жүзеге ас-қанын жеткізді. Сондай-ақ, осы ұйымның жұмыс жасау жүйесімен таныстырып өтті.
Кәсіпорындардағы жастар ісі жөніндегі комитеттердің жұмысын жүйелеу бойынша «Семей машина құрастыру зауыты» АҚ-ның жас маманы Дастан Жетпісев баяндама жасады. Өзі еңбек етіп жүрген өндіріс ошағындағы жастар ісі жөніндегі комитетінің құрылғанына аз уақыт болса да, біраз шаруаның атқарылғанын тілге тиек етті. Мәселен, осы ұйымның бастамасымен зауыттағы арнайы демалыс бөлмелерінде спорттық жабдықтар, нақтысын айтқанда, теннис үстелдері қойылып, жұмысшылардың салауатты өмір салтын ұстануына жағдай жасал-ған. Дархан Жетпісев бұл бастамының тек басы ғана екенін, алда көптеген істерді жүзеге асыру көзделіп отырғанын жеткізді.
Жиынға қатысушылар жастар дегенде оқу орындарындағы студенттер немесе мектеп оқушылары деген ұғыммен шектеліп қалмай, кәсіпорындарда да жастар ісі жөніндегі комитеттерді көптеп ашып, олармен тығыз байланыс орнату керектігін атап өтті. Себебі, осындай ұйымдар жұмысшы жастардың проблемаларын анықтап, дер кезінде шешімін табуға септігін тигізетіні анық.
Мирас ҚҰСАЙЫН,
«Семей таңы»
