Облыс әкімі Даниал Ахметов Шығыс Қазақстанда тұрғын үй құрылысының жаңа бағдарламасын жүзеге асыратын 12 құрылыс компаниясының пулымен кездесу өткізді. Бұл туралы аймақ басшысы өзінің Instagram әлеуметтік желісіндегі парақшасында жазды.
Биылдан бастап облыста жеке компаниялар есебінен салынатын коммерциялық тұрғын үй құрылысы артады. Алғашқы 12 компания жұмыс істеуге дайын екендерін білдіріп, өз жобаларын ұсынған. Мысалы, «Дейнека» ЖШС Өскеменде аумағы 23,7 мың шаршы метрді құрайтын 243 пәтерді іске қосса, «Фирма Азия» ЖШС Семейде үш көп қабатты коммерциялық үйдің құрылысын бастаған. Құрылыс жұмыстарына сондай-ақ «Сәтті», «Өскемен құрылыс», «Жайлылық технологиясы», «ARYS STROY» және басқа да компаниялар тартылмақ.
— Құрылыс жұмыстарына Өскемен мен Семейдің ғана емес, Нұр-Сұлтан мен Алматы қалаларының да өкілдері жұмылдырылып отыр. Коммерциялық тұрғын үй салудың мұндай тетігі республикада әлі ұсынылған жоқ. Бұл шығыстың тағы да алда екенін білдіреді. Инвесторлар құрылыс алаңдарымен, меморандум шарттарымен танысып шықты. 10 күннен кейін барлық қажетті құжаттарға қол қойылады. Бұл қадам, ең бастысы, бізге бас мердігерлермен арада туындайтын мәселелерді жоюға мүмкіндік береді. Құрылыс алаңын таңдаудан бастап аумақты түпкілікті абаттандыруға дейінгі жұмыс толық бір компания міндетіне кіретін болады,- деді аймақ басшысы Д.Ахметов.
Бүгінгі таңда облыс тұрғындарының депозиттерінде 460 миллиард теңге бар. Бұл қаржы тұрғындар сұранысының жоғары екенін айғақтайды. Ал құрылыстың жаңа тетігін қолданатын алғашқы инвесторлар ең тиімді шарттарға ие болады.
— Келесі аптада «Ертіс» әлеуметтік-кәсіпкерлік корпорациясымен бірге «Бірқабатты Шығыс» бағдарламасы бойынша жеке тұрғын үй құрылысымен айналысатын компаниялардың тағы бір пулын жинаймын. Айта кетейін, бұл бағдарлама аясында әр шаршы метр құны реттелетін болады. Мәселен, Семейдегі бір қабатты үйдің шаршы метрі 140 мың теңге болса, Өскеменде 160 мың теңгені құрайды. Қажет болған жағдайда, құрылыс компанияларына үйлердің бұған дейін әзірленген жобаларын ұсынуға дайынбыз,- деді Д.Ахметов.
Құрылыс жұмыстары тұрғын үйлердің санын көбейіп қана қоймай, бәсекелестік ортаны қалыптастыруға мүмкіндік береді. Бұл өз кезегінде бағаның төмендеуіне әкеледі.
Сонымен қатар, жаңа инвестициялар тартылып, жұмыс орындары ашылады. Ал «Отбасы Банкі» коммерциялық тұрғын үйлер үшін арнайы ипотекалық несиелеу жүйесін де әзірлеп жатыр. Кездесуге қатысқан қаржы институтының өкілі атап өткендей, жобаға халық тарапынан қызығушылық бар.
⠀Айтолқын САМАТОВА, «Семей таңы»
