Еліміз Тәуелсіздік алғанына биылғы жылы 30 жыл толғалы отыр. Бұл айтулы мерейлі жылы өткенімізді талғам таразысына салып көрсек, бұрын-соңды болмаған талай жетістіктерге қол жеткіздік. Ең бірінші, әлем картасынан ойып тұрып орын алған ұлан-ғайыр мемлекетіміз бар. Өз Әнұраны шарықтаған, Елтаңбасын төрге оздырған, Көк Туы асқақ желбіреген, төл теңгесі мен жаңа астанасы бар елге айналдық. Төңірегімізді түгендеп, іргемізді бекітіп, шекарамызды шегендедік. Қуатты Қарулы Күштеріміз айбынданып келеді. Өркениет көшіне ілесіп, озық технологияларды қолданып, дамудың даңғыл жолына түсіп келеміз. Тарихымызды қайта қарап, мәдени мұраларымызды жинақтап, руханиятымызды да байытуға еркін жол ашылды. Азаттықтың алауын жағып, бостандықтың бағасын сезініп отырмыз. Өзгелермен терезесі тең, керегесі кең Қазақстанның жеткен биік асуларына қызыға қарайтындар жетерлік. Осының бәрінің жүзеге асуына Қазақстан Республикасының Тұңғыш Президенті — Елбасы Нұрсұлтан Әбішұлы Назарбаевтың сіңірген еңбегі өлшеусіз. Оны әр қазақ баласы біледі.
Мен туып-өскен Семей өңірі — талай тарихи оқиғалардың куәгері, менің рухымның алтын бесігі. Елбасының Семей ядролық полигонын жабу туралы Жарлыққа қол қойып, іргедегі аждаhаның үнін өшіргенін менің жерлестерім ешқашан ұмытпайды!
Сол Семейде бастамашыл топ Қарағайлы жаңа тұрғын ауданындағы жаңа көшені Нұрсұлтан Назарбаев даңғылы деп атауды ұсынған екен. Бұл ұсынысты бар ынта-ықыласыммен қолдайтынымды жеткізгім келеді. Еліміз көркейген үстіне көркейе берсін. Алты Алаштың айбынына айналған айдынды Ертістің қос жағасын қоңыраулатқан Семейіміз гүлдене берсін! Алла Тағала халқымызды ынтымақ-ырысынан, береке-бірлігінен айырмасын!
Бауыржан ЖАҚЫП, ақын, Қазақстан Жазушылар одағы басқарма төрағасының орынбасары, ҚР ҰҒА корреспондент-мүшесі, «Құрмет»орденінің иегері{jcomments off}