Апта дүйсенбісі, наурыз айының 22-ші жұлдызында Семей қаласындағы Абай Құнанбайұлы атындағы жаңа мешіт жамағатқа есігін ашты. Түркі жұртының мейрамына орай ел игілігіне берілген имандылық үйінің ашылу салтанатына Семей қаласының әкімі Нұрымбет Аманұлы Сақтағанов, ҚМДБ Төрағасы, бас мүфти Наурызбай қажы Тағанұлы және Нұр-Сұлтан мен Алматы қалаларынан ел ағалары, өнер жұлдыздары мен зиялы қауым өкілдері арнайы келіп қатысты.
Семей қаласының дәл ортасындағы құрылысы ұзақ жыл бойы тоқтап тұрған бұл мешітті жерлесіміз, Тарбағатай өңірінің тумасы, белді кәсіпкер Дулат Тастакеев қолға алып, жақында ғана толықтай аяқтаған болатын.
Салтанатты шарада сөз алған бас мүфти Наурызбай Тағанұлы, хакім Абай айтқандай, «қиянатшыл дүниенің» кірінен тазарып, бар арманының орындалуын, үмітінің ақталуын тілеп, дұға жасайтын қадірлі үй мешіттің ашылуымен барша Семей жұртшылығын құттықтады.
— Бүгін – тарихи күн. Абай елі бұл күнді көп күтті. Осы мешіттің ашылуын біз де ұзақ күттік. Міне, ел Тәуелсіздігінің 30 жылдығы қарсаңында, Наурыз мерекесінде барша Семей халқының игілігіне беріліп отыр. Жаратушы Иеміз Құран Кәрімде: «Мешіттерді тек Құдірет иесіне және ақырет күніне иман келтірген, намаз оқыған, зекетін берген және Алладан басқа ешкімнен қорықпайтындар ғана салады»,- деген болатын. Ең бастысы, сауапты іс жасаймын деген азамат атақ пен абырой алу үшін емес, Жаратушының разылығын алуды мақсат етуі керек. Өйткені бұл — елдің діни және рухани дамуына, жастардың дұрыс тәлім-тәрбие алуына үлес қосатын орын. Міне, сондықтан қазақ даласында мешіттер салына берсін, иманды қоғам арта берсін дегіміз келеді.
Тұсаукесер рәсіміне әр өңірден келген өнер, әдебиет, мәдениет майталмандары да ақжарма тілектерін жеткізді. Игі шарада сөз алған Асанәлі Әшімов, Мұхтар Шаханов, Жүрсін Ерман сынды елімізге танымал азаматтар семейліктерді қатар келген қос тоймен құттықтады.
Тек аймағымыздағы ғана емес, ел көлеміндегі ерекше, ең сәулетті мешітте 2500 адам бір уақытта намаз оқи алады. Ғимараттың ішінде діни жоралғыларды өткізуге арналған кең бөлмелер де қарастырылған. Яғни, жамағат үшін барлық жағдай жасалған.
Сонау 2008 жылы іргесі қаланғанымен, түрлі себептермен құрылысы тоқтап қалған құлшылық үйінің құрылысы үш жылдың ішінде аяқталды. Ал сыртқы абаттандыру жұмыстарына Абай Құнанбайұлының 175 жылдық мерейтойына орай Түркістан облысы демеушілік жасаған болатын.
Жаңа мешіттің ашылу салтанатынан соң қайырымдылық шарасы өтті. Игі бастамаға қолдау білдірген бас мүфти Наурызбай қажы Тағанұлы Семейдегі мешіттерде білім алып жүрген балаларға сый-сияпат табыстады. Оның ішінде 7 балаға бас мүфтидің гранты берілді. Грант иегерлері енді еліміздің әр түкпіріндегі медреселерде өз білімдерін шыңдайды. Сонымен қатар бес көп балалы отбасыға Қазақстан мұсылмандары діни басқармасының қолдауымен «Зекет» қайырымдылық қоры есебінен алынаған жаңа баспаналар тарту етілді. Әз Наурыз мейрамында қуанышқа кенелген жандар қайырымдылық шарасына мұрындық болып, өздеріне демеушілік жасаған азаматтарға ризашылықтарын білдірді.
Дәл осы күні Семей қаласының Дальний кентінде жергілікті кәсіпкерлердің қаражатына салынған тағы бір сәулетті мешіт ашылды. Салтанатты шараға ҚМДБ Төрағасы, бас мүфти Наурызбай қажы Тағанұлы, Семей қаласының әкімі Нұрымбет Аманұлы және қала тұрғындары қатысты.
Құлшылық үйі 400 адамға арналған. Мешіт жанынан бір мезетте 40 бала жатып оқитын қайырымдылық мекемесі де қатар ашылды. Тәлімгерлер үшін жатақхана, асхана, оқу бөлмелері қарастырылған. Бұл кентте бұрын-соңды мешіт болмаған.
Бас мүфти қайырымдылық мекемесін арнайы аралап көрді.
Айта кетейік, мешітке Орта Азияға танымал дін қайраткері, ғалым 1948 жылдан өмірінің соңына дейін 26 жыл Семей қаласындағы бір мұнаралы «Ағаш» мешітінің бас имамы болған Хакім Хазірет Омарұлының аты берілді. Бұл мешіт пен қайырымдылық мекемесінің құрылысы 2019 жылы басталған болатын. Медреседе балаларға діни білім беріп, болашақта Құранды жатқа білетін қариларды дайындау көзделген.
Имандылық үйінің ашылуында бас мүфти Наурызбай қажы Тағанұлы мешітке Қасиетті Құран мен кәдесый тарту етсе, Хакім Хазіреттің ұрпағы әкесінің сәлдесін табыс етті.
Мешіттің ресми ашылуына ҚМДБ аппарат басшысы Ғылымбек Жәдігерұлы мен “Зекет” қайырымдылық қорының директоры Талғат Омаров та қатысты.
Әлібек КЕМЕЛХАН, «Семей таңы»{jcomments off}
