Наурыз мейрамы кезінде халық көшелерге шығып, сауық-сайран құрады, күш пен төзімділікті, тапқырлық пен жылдамдықты талап ететін ұлттық ойындар ойналады.
Өкінішке орай, биылғы жылы коронавирустық пандемияға байланысты жаппай мерекелеуге тыйым салынды. Бірақ ШҚО Қазақстан халқы Ассамблеясының еріктілері көктемгі жаңару мерекесін бірге қарсы алып, шағын спорттық жарыстар өткізді.
Облыстық Достық үйі — Қоғамдық келісім орталығында Шығыс Қазақстан аумағында тұратын этностардың ұлттық ойындары ұйымдастырылды. Еріктілер қазақ, орыс, татар, белорус халықтарының эстафеталық ойындарына қатысу үшін екі командаға бөлінді.
— Наурызды тойлауға арналған кешенді іс-шаралар жоспарына спорттық жарыстар өткізу да кіреді. Біз, жастар, облысымызда тұратын этностардың ежелгі дәстүрлерді ұмытпауын, қандай ұлттық ойындар бар екенін білгенін қалаймыз. Өйткені Наурыз — махаббаттың, жаңарудың және береке-бірліктің символы, – деп атап өтті өз сөзінде Достық үйі — Қоғамдық келісім орталығы директорының орынбасары Равиль Юнусов.
ШҚО Қазақстан халқы Ассамблеясының еріктілері мейрамды көңілді өткізіп қана қоймай, ойын барысында өз денсаулықтарын да шынықтыра алды. Жастар қазақтың ұлттық ойыны «көтермектен», асық атудан сайысқа түсті, сонымен қатар сөмкемен жүгіру және қазыққа сақина лақтыру, ағаш үстімен жүру, арқан тарту, гір көтеру сынды орыс және татар халықтарының ойындарынан эстафеталық жарыстарға қатысты, шахмат та ойнады.
— Наурыз мейрамында табиғат қысқы ұйқыдан оянып, ауа райы жылынады. Бұрын мерекені неғұрлым көңілді өткізсе, табиғат адамдарға соғұрлым жомарт болады деп сенген. Біз де көктем мерекесін көңілді және қызықты қарсы алдық, ал жарыста достық жеңді. 22 наурызда менің туған күнім, сондықтан мен үшін бұл ерекше мереке, бұл күні отбасымызбен үйде ұлттық тағамдар дайындаймыз, – дейді ШҚО ҚХА еріктісі Азат Бейбітұлы.
Ұлттық ойындардан соң барша еріктілерге облыстық Достық үйінің қызметкерлері шағын сыйлықтар табыс етті.
Азамат ЕРСАЙЫН, «Семей таңы»{jcomments off}
