Шығыс Қазақстан облысында құтқарушылар су тасқынының алдын алу үшін қар жамылғысындағы ылғал қорын өлшеуде. Бүгінгі күні облыс аумағында тасқынның алдын алу шаралары күшейтілген.
ШҚО Төтенше жағдайлар департаменті баспасөз қызметінің мәліметіне сүйенсек, құтқарушылар мен «Қазгидромет» РМК ШҚОФ мамандары бірлесіп, қар жамылғысындағы ылғал қорына мониторинг жүргізуде. Осы мақсатпен олар жол талғамайтын техникамен Өскемен қаласына және Таврия, Привольное мен Кіші Қарасу ауылдарына барған. Қардың тығыздығын айқындайтын «ВС-43» құрылғысының көмегімен өлшеу жұмыстары жүргізілді.
«Аймақ бойынша тексерілген аумақтардағы қар жамылғысының деңгейі 50%-ды құрап отыр. Сондай-ақ өлшеу жұмыстары Восточное ауылында жүргізілді. Мұнда қар жамылғысы — 90%, орташа биіктігі — 35 см-ді құраса, қардағы су қоры — 126 мм-ге жеткен. Привольное ауылында қар жамылғысы — 70%, биіктігі — 83 см, су қоры — 241 мм. Шағын жыраларда қар жиналуы байқалады», — делінген хабарламада.
Мамандардың айтуынша, облыста ауа температурасы күрт жылынып, жауын-шашын көп болған жағдайда су тасқыны қаупі сақталады. Сол себепті құтқарушылар қызу қарқынмен даярлық жұмыстарына кіріскен.
ШҚО Төтенше жағдайлар департаменті баспасөз қызметінің мәліметіне сүйенсек, Өскемендегі жедел құтқару жасағы базасында дайындық жұмыстары жүргізіліп жатыр. Көмекке келген құтқарушылар тобы альпинизм мен су асты дайындығын жүргізуде. Алғаш қабылданғандар әуелде теориялық кезеңнен өтті. Олар жабдықтармен, жарақтармен жұмыс істеу, қауіпсіздік техникасы мен алғашқы медициналық көмек көрсету тәсілдерімен танысты.
Осы салада 20 жылдан астам уақыт еңбек етіп келе жатқан облыстық ТЖД жедел құтқару жасағы бастығының орынбасары Евгений Егоров альпинистік бағыт аймағымыздың құтқарушылары үшін ең маңызды деп есептейді. Дайындық барысында көмекке келген құтқарушылар жергілікті мамандарға арқанды байлау тәсілдерін, биіктен түсу техникасы мен бекітілген арқанмен шығу әдістерін үйретті.
«Шығыс Қазақстанда 2000-нан астам су айдыны бар. Жыл сайын шағын және ірі өзендерде, көлдерде жазатайым оқиғалар болып жатады. Сондай жағдайларда жедел әрекет ету үшін құтқарушы-сүңгуірлер қажет. Дайындық кезінде құтқарушылар тереңге сүңгу, су астында бағдар жасау, құтқару жұмыстары орындарын тексеру дағдыларын жетілдірді. Сондай-ақ суға батып кеткендерді іздеуді де үйренді»,- делінген хабарламада.
Әлібек КЕМЕЛХАН, «Семей таңы»{jcomments off}
