Сұлу да көркем, кербез де көрікті, өнерлі де қылықты қыздар қазақтың мақтанышы ғой. Баян Сұлу мен Қыз Жібектің, мың бұрала билеген Шараның, дархан даланы күйімен тербеткен Динаның, қазақтың анасына айналған Айғаным мен Зере, Ұлжан аналардың ізбасарлары да қазақтың қаракөздері.
Рымбек Байсейітов атындығы қаржы-экономикалық колледжінде тәлімді тәрбие көрген, бір бойында тұнып тұрған өнері бар студенттері Наурыз мерекесі қарсаңында білімі мен өнерін, тапқырлығы мен талғамын ұштастыр-ған, сұлулығы мен сымбатын сынға салған «Колледж аруы — 2014» байқауына қатысып, бұрымдылар өзара мықтыны анықтады.
Бұл шараны аталмыш оқу ордасының ұжымы ұйымдастырған. Ұйымдастырушылардың айтуынша, әр курс және түрлі топтардан 30 үміткер байқауға қатысуға ниет білдірген. Олардың 16-сы соңғы сынға жолдама алған екен. Үміткерлерді іріктеу барысында ең басты талап – білім сапасы болды. Сонымен қатар, колледж өміріне, қоғамдық жұмысқа белсенді түрде араласып жүрген бұрымдылар таңдалған. Шараның мақсаты да аруларды инабаттылыққа, кішіпейілділікке, қазақ қызына тән игі қасиеттерге тәрбиелеу.
Ұйымдастырушылар атап өткендей, колледждің аруы атануға лайықты қыз салт- дәстүрді, әдет – ғұрыпты жетік білу міндеті де бар. Байқау шартына белгіленген бес бөлімде осы жайттар жан-жақты қамтылған. Айта кетерлігі, мұндай шара биыл алғаш рет ұйымдастырылып отырған жоқ. Тек өткен жылмен салыстырғанда салт-дәстүрмен ғана шектелмей, қыздарға өздерін таныстыру барысында заманауи технологиялардың көмегіне жүгініп, әрлеу жасауға мүмкіндік берілген.
Қазақтың ұлттық нақыштағы көйлектерін киіп, сұлулана түскен Баян Сұлудың, Қыз Жібектің бүгінгі жалғасы іспетті арулар сахна төріне шыққанда қошемет көрсетпеген көрермен болмады. Үкілеген үміттеріне дем беріп отырғандардың дені қатысушылардың топта бірге оқитын достары, туыстары, ұстаздары еді.
Бес белестің алғашқысы – «Таныстыру» сайысы ерекшеліктерге толы болды. Үміткерлер өздерінің қызығушылықтары мен мүмкіндіктерін, қарым-қабілеттерін арнайы әзірленген бейнеролик арқылы байқатты. Ал «Өнер» бөлімде қыздар шығармашылық мүмкіндіктерін паш етті. Әр ұлттың биі биленді, қос шынашақтан күй төгілді, тіпті, тыңдаушысына поэзиядан үзінді оқып тамсандырған арулар да болды.
{jcomments on}Қыздардың түр-сымбаттары мен ұшқыр қиялдарын, шеберліктерін сынға салған «Сән үлгісі» сайысы екені даусыз. Бұл кезеңнің басты талабы – қиялға ерік бере отырып, қатысушылардың өздері қолдан тіккен киімдерін көпшілікке ұсыну. Талапты жоғары дәрежеде орындаған үміткерлер сән үлгісін көрсетіп, жиылған жұртты таңдандырды. Төртінші бөлімде қыздар қазақтың ұлттық тағамдары мен олардың дайындалу әдістеріне тоқталды.
Қорытынды кезең «Колледж аруы — 2014» атағына лайықты қатысушыны анықтауда орасан зор рөл атқарды. Салт-дәстүрімізден сыр шерткен сайыс сұрақ-жауап арқылы өрбіп, арулар «көрімдік беру», «шашу», «жар-жар» айту сияқты бірқатар дәстүрлердің және ұлттық ойындар мен тағамдардың тарихына тоқталып, мән-мағынасын ашып айтты. Қатысушылардың қазақы дәстүрден сусындағанын аңғару қиын емес еді. Байқау салт-санамызды ұлықтауымен де ерекше болған сыңайлы. Жоғары дәрежеде өткізілген сайысқа төрелік еткен әділқазыларға жеңімпазды анықтау оңай болмады.
Көрерменіне көтеріңкі көңіл күй сыйлаған сайыстың қорытындысында «Колледж аруы -2014» тәжі Әмина Серікқазиеваға бұйырса, сәл ғана ұпай айырмасымен жиылған жұртты мың бұралған биімен, қазақ қызына тән қылығымен тәнті еткен Айнұр Асанова бірінші орынды жеңіп алды. Назерке Темірбаева мен Қарлығаш Ахметханова тиісінше екінші және үшінші орынды бөлісті.
Әйгерім СӘРСЕНҒАЛИ,
«Семей таңы»
