Өткен аптада қаламызда таланттарымен талайды таңдай қақ-тырған дарынды жастардың «Алтай жұлдыздары» атты II облыстық байқауы өтті. ШҚО әкімі Бердібек Сапарбаевтың бастамасымен ұйымдастырылған аталмыш игі шараның өтуіне мұрындық болғандар облыстық білім басқармасы мен М. Төлебаев атындағы музыкалық училище ұжымы болды.
Екі жылда бір ұйымдастырылатын байқау алғаш рет 2012 жылы облыс орталығында өтсе, биыл ұйымдастырушылар қазақтың мәдени-рухани астанасы саналатын Семей шаһарында өткізуді жөн көріпті. Тасада жүрген жас таланттардың шарыққа шығуына септігін тигізетін байқаудың берері мол.
— Негізгі мақсат — жастар арасында орындаушылық өнерді дәріптеу, өнерпаз жастарды іздеу және оларға қолдау көрсету. Сонымен қатар, болашақ түлектерге өнер бағытындағы оқу орындарына жөн сілтеу,- деді М. Төлебаев атындағы музыкалық училищесі директорының тәрбие ісі жөніндегі орынбасары Талғат Сапанов.
Халық аспаптары, вокал, хореография номинациялары бойынша ұйымдастырылған байқауда аудандық іріктеуден сүрінбей өткен 14 жастан асқан (9-11 сынып оқушылары) 300 үміткер өнерлерін ортаға салды. Әділқазылар алқасының мүшелері де өнерді түсінетін қаблетті адамдардан іріктеліп алынған. Есімі елге танымал Нұрлан Көшеров, Толғанбай Сембев сияқты азаматтар бастаған білікті мамандар жас таланттардың өнеріне тәнті болып, бағасын берді. Шын мықтыны анықтайтын сынның соңғы салтанатты жиыны қалалық мәдениет сарайында өтті.
{jcomments on}- «Алтай жұлдыздары» байқауы жаңа таланттарды дүниеге әкеліп, жас жұлдыздардың жарқырап жануына жол ашты. Семей топырағынан шыққан ән атасы Әміре, бұлбұл дауысты Бибігүл, Роза сынды шоқтығы биік жұлдыздардың қатары бүгінгі жеңімпаздармен толығады деп сенеміз, — деген Талғат Сапанов жүлделі жастар өнердің даңғыл жолынан өз орындарын табатындықтарына сенім білдіре отырып, оларды өнер аламанына қосқан ұстаздарына да алғыс айтты.
Байқау қорытындысына сәйкес, «Қазақ және орыс ұлттық аспаптары» аталымы бойынша Ғалия Құнтаева (қобыз аспабымен, Семей қаласы), Тимур Азбилов (гитара аспабымен, Семей қаласы) ал, «Хореография» аталымында жеке орындаудан Сая Тұрысбекова (Қарақол ауылы), ансамбльдер ішінде «Құралай» тобы (Бесқарағай ауданы), «Ән орындау» аталымы бойынша Айсана Ғабидоллаева (Семей), Жәнібек Сембаев (Шемонаиха), Бейсенова Айбала (Аякөз) І дәрежелі жеңімпаздар деп танылды. Бұл дарынды жастарға М. Төлебаев атындағы музыкалық училище мен Өскемен қаласындағы Шығыс Қазақстандық ағайынды Абдуллиндер атындағы өнер училищелерінің оқу гранттарына сертификат табысталды.
Әйгерім СӘРСЕНҒАЛИ,
«Семей таңы»
