3 сәуір, сенбі күні Семейде жалпықалалық сенбілік өтті. Сенбілікке шаһар басшысы Нұрымбет Сақтағанов, әкімдік қызметкерлері, кәсіпкерлер және басқа да сала өкілдері қатысты.
Сенбілік таңертең ерте басталды. Қолына күрек пен сыпырғышын алған көптеген мекеме қызметкерлері мен мемлекеттік қызметшілер бұл күні қаланың бірқатар аудандарын қоқыстан тазартты. Сенбілік тікелей қала әкімі Нұрымбет Сақтағановтың бастамасымен ұйымдастырылды.
— Бүгін біз тазалық айлығын бастадық. Қаланың барлық ауданы мекемелерге бөлініп берілді. Әр аймаққа жауапты адам бекітілді. Бізге техникалық жабдықтармен көмектескен кәсіпкерлерімізге, соның ішінде қатты тұрмыстық қалдықтарды полигонда орналастыру үшін 200 абонемент бөлген ЖК «Хазиповқа» алғыс айтқым келеді. Қала тазалығы – бәрімізге ортақ іс. Семейліктерді сенбілікке өздері ғана шықпай, балаларын да ертіп келуге шақырамын. Сонда олар жастайынан еңбекке, тазалыққа дағдыланып, көше тазалайтын адамдардың жұмысын бағалайтын болады,- деді Нұрымбет Сақтағанов.
Бұл күні көшелерде 30-ға жуық техника жұмыс істеп, жол жиегінен қоқыс жинады. Жиналған қоқыс полигонға апарылды.
— Сенбілікке шығу – біздің ерікті шешіміміз. Көктемнің осындай жайма-шуақ күнінде қаламызды қоқыстан тазартуға мен де өз үлесімді қосқым келді. Таза қалада жүру әлдеқайда жақсы екені сөзсіз. Көшелер таза болса, көңіл-күйіміз де көтеріңкі, айналаның тазалығы адамға шабыт сыйлайды, — дейді ішкі саясат бөлімінің сектор меңгерушісі Жанна Үйсімбаева.
