Тарихта «мағынасыз соғыс» атанып, талай жасты қыршыннан қиған Ауған соғысының аяқталып, Кеңес әскерлерінің Ауған жерінен шығарылғанына да биыл 25 жыл. Кеңес Үкіметінің тарихына таңба болып басылған соғыстың алапаты әлі де болса ұмыт болмады. Жүректерінде жазылмас жарасы бар жандар қашан да биліктің назарында.
Қала әкімі Айбек Кәрімов өткен аптада Ауған соғысы ардагерлерімен кездесті. Қала басшысы Ауған соғысының ардагерлеріне қашан да үлкен құрметпен қарайтындығын, өйткені, олар жалынды жастық шақтарын Отанға арнап, майдан даласына аттанып, қиян-кескі ұрыстарды өз көздерімен көрген, бейбітшіліктің қадірін білетін азаматтар екенін айрықша атап өтті. Сондықтан, олардың бұл ерлігі ешқашан ұмытылмайтынын да айтқан Айбек Мүталапханұлы Ауғанстан жерінде ерлікпен қаза тапқан жауынгерлердің отбасылары да жергілікті биліктің назарынан тыс қалмайтынын жеткізіп, ардагерлердің ұсыныс-тарына, мәселелеріне мән берді.
Қалалық Ауған соғысы ардагерлер кеңесінің төрағасы Боранбай Бегатов өздерінің отыратын кеңселерінің мәселесін айтып өтіп, интернационалист-жауынгерлерді баспанамен қамтамасыз ету, оларға құрылыс салу үшін немесе қандай да бір кәсіппен айналысу үшін жер телімдерін беру және дәрігерлер тарапынан жақсылап көңіл бөлініп, сол сияқты денсаулықтарын оңалту үшін ардагерлердің әрқайсысына еліміздегі шипажайларға жолдама беру жағын қарастырып, осы мәселелерді шешуге көмек көрсетуін сұрады. Сонымен қатар, Боранбай Бегатов қаладағы Ауған соғысы құрбандарына арналған ескерткіш жайлы да сөз қозғады.
Барлық мәселені мұқият тыңдаған Айбек Мүталапханұлы әр мәселеге жеке-жеке тоқталып өтті. Мысалы, қалалық әкімдіктің ішінен Ауған соғысы ардагерлер ұйымына кеңсенің қарас- тырылғанын атап өтті. Ал, шипажай мәселесі аса қиындық тудырмайтынын, мысалы, «Уба» шипажайы да қызмет көрсету жағынан өзгелерден кем емес екендігін тілге тиек етті. Ал, денсаулық мәселесін дәрігерлерге ғана артып қоймау керек екендігін, оған әр адамның өзі жауапты екенін де айтып өтті. Егер медициналық мекемелер дұрыс қарамаған жағдайда арнайы шара қолданылатынын жеткізді.
Қала басшысы Ауған соғысы құрбандарына арналған ескерткіштен өзінің ешқандай әсер алмайтындығын да жасырмады. Ал, аталмыш ескерткіш Семей мемлекеттік медициналық университетіне қарсы бетте орналасқаны белгілі. Алайда, қала сәулетінің заңдылығы бойынша білім ордасының маңында ондай ескерткіштің болуы көңілге қонымсыз. Кезінде ретсіз қойылған ескерткішті алдағы уақытта басқа жерге көшіріп, қажет болса, жаңадан салу керек екендігі жайлы өзінің ұсынысын айтқан Айбек Кәрімов бұл тақырып тұрғысында Боранбай Бегатов бастаған Ауған соғысының ардагерлеріне қаланың бас сәулетшісі Қалдыбек Қоқилановпен кеңесіп, онымен бірігіп жұмыс жасауды жүктеді. Ал, ескерткіш маңындағы тәртіптің сақталмауы жол сақшылары жұмысының сылбырлығы салдарынан екендігін атап өтті.
{jcomments on}Сонымен қатар, жиында сөз алған ауған соғысының ардагерлері майдан даласында қаза тапқан жауынгерлердің ата-аналарына қоғамдық көліктерде тегін жүретіндей жеңілдіктер қарастырылса, сондай-ақ, жағдайы төмен Ауған соғысының ардагерлеріне және ардагерлерге коммуналдық төлемдер жағынан көмек көрсетілсе деген ұсыныс-тілектерін де айтты. Жиынға қатысушылардың бірі Рита Қыдырманова баспана мәселесін сөз етті. Оның ұлы Ермек Қыдырманов 1983 жылы Ауған соғысына аттанып, бір жылдан кейін мерт болған. Қара жамылып қалған ананың айтуынша, ақпан айында оның қаладағы 2 бөлмелі пәтері өртеніп кеткен. Тілсіз жаудың кесірінен үйсіз қалған 72 жастағы Рита апа денсаулығы сыр беріп, ауруханадан жақында ғана шыққан. Бүгінде қызының қолында тұрып жатқанын айтқан жалғызбасты ана қала басшысынан көмек сұрай келіпті.
Қала басшысы Рита Қыдырмановаға жақын арада пәтер берілетіндігін айтты. Ал, ұсыныс-тілектер бойынша электр жарығынан басқа жылу мен су мәселесіне жеңілдіктерді қарастыратынын да айтқан Айбек Мүталапханұлы қоғамдық көліктерде де жеңілдікпен жүру жағын шешуге көмектесетінін жеткізді.
— Ауған соғысының ардагерлерінің ерліктері жас ұрпақты патриотизмге, отансүйгіштікке тәрбиелеудегі маңызы зор. Сондықтан, оларды қай кезде де қолдаймыз. Егер қандай да бір ұсыныстарыңыз болып жаста, қай кезде де көмектесуге әзірміз. Менің өз басым тек қала әкімі ретінде емес, азамат ретінде көмектескім келеді, — деген Айбек Мүталапханұлы ден- саулығы қалыпты бола тұра азаматтардың Үкіметке алақан жая беруге де болмайтын- дығын ескертіп өтті.
Сонымен қатар, Ауған соғысының ардагерлері қаладағы № 40 мектепте өздерінің құрған мұражайлары бар екенін айтты. Айтуларынша, аталмыш мұражайға қарайтын қызметкерге ардагерлердің өздері арнайы жалақы төлеп отырған. Алайда, қаражат жағы қолбайлау болғандықтан, бүгінде мұражайға қарау аталмыш мектептің оқушыларының құзырында көрінеді. Жиын барысында осы мәселе туралы да сөз қозғаған ардагерлерге қала әкімі жуық арада бұл мәселенің шешімін табатындығын атап өтті.
Нұрдәулет КӘКІШЕВ,
«Семей таңы»
