2017 жылы Астанада өтетін ЭКСПО көрмесіне орай елімізде түрлі шаруалар атқарылып жатыр. ЭКСПО-2017-нің мән маңызын түсіндіруде рөлі үлкен шаралар Семейде ұйымдастырылып келеді. Соның бірі — Балалар және жас-тар шығармашылығы сарайында өткен «Жасөспірімдердің шығармашылығы ЭКСПО — 2017 балалардың көзімен» атты көрме-байқау.
Көрме барысында келушілер мектеп оқушылары жасаған түрлі экспонаттарды тамашалауға мүмкіндік алды. Оның ішінде ағаштан және басқа да материалдардан дайындалған кәдесыйлар мен бұйымдар бар. Оқушылар өздерінің жасаған дүниелері арқылы ЭКСПО – 2017 көрмесі жайындағы ойларын жеткізуге тырысқан. Бірі адамдар серуендап жүрген әдемі саябақтың паносын жасау арқылы ЭКСПО-2017 көрмесінің жасыл экономика мен энергетикаға қарай қадам басуда септігі зор екендігін көрсеткісі келсе, екіншісі осы тақырыпта сурет салған. Шараның басым бөлігі осы қолөнер бұйымдарын қам- тыған.
Көрменің тақырыбына байланысты қатысушылар әр түрлі техникалардың кішірейтілген нұсқаларын дайындап әкелген. Атап айтқанда, шағын жел электростансалары, күн батареялары, ұшақтардың, кеме, қайықтардың, металдан, ағаштан жасалған макеттері. Шара барысында келушілердің қызығушылығын тудырған көбінесе техникалардың жұмыс істеп тұрған шағын модельдері болды. Березовский кентіндегі орта мектептің оқушылары сұраған кісілерге өздері жасаған жел электростансасының жұмыс істейтінін көрсетіп отырды. Сондай-ақ, олар арнайы тоқ күшін өлшейтін құрал арқылы күн батареяларының шағын нұсқасының қуат өндіре алатынын дәлелдеді. Басқа қатысушылар да өздері әкелген техникалық экспонаттардың дұрыс жұмыс жасайтынын оларды қозғалту арқылы көрнекі түрде дәлелдей білді.
Ұйымдастырушылар бұл көрменің мақсаты оқушылардың шығармашылық қабілеттерін дамыту, өскелең ұрпақты ғылыми-техникалық және өнертапқыштық ізденіске баулудың түрлерін жетілдіру екенін жеткізді. Сондай-ақ, олар 2013 жылы оқушылардың қабілетін жетілдіруде бағыт-бағдар беретін мекемеге айналып келе жат-қан жас техниктер стансасының ашылғанын айта отырып:
{jcomments on}- Түрлі үйірмелерге қатысу оқушыларға есейген кездерінде мамандықты саналы түрде таңдауға, еңбек саласын таңдауға, білім алуды жалғастыру жолдарын таңдауға мүмкіндік алады. Сондай-ақ, аталмыш шара балаларға өздерінің жасаған дүниелерін көрсетіп қана қоймай өзгелердің техникалық шығармашылығымен де танысып, ой бөлісуге жағдай тудырады, — деген пікір білдірді. Көрме барысында ұстаздар қауымы ағаш ою, кілем тоқу, бастапқы техникалық модельдеу, қуыршақ жасау, илеу ісі бойынша шеберлік сабақтарын өткізді. Жалпы алғанда шараға қала және қалаға қарасты ауылдық жерлердегі 33 мектептің оқушылары қатысты. Көрме сөрелеріне 336 экспонат қойылды.
Көрме қорытындысы негізінде, техникалық шығармашылық, декоративтік-қолданбалы, көр-кемдік-техникалық шығармашылық, зерттеу жобалары, ұстаздардың авторлық жобалары номинациялары бойынша жеңімпаздар дипломдармен марапатталып, қатысушылардың барлығына сертификаттар табысталды.
Мирас ҚҰСАЙЫН,
«Семей таңы»
