Сейсенбі күні қалалық әкімдікте облыс әкімінің орынбасары Нұрлыбек Шерубаев, қала әкімінің орынбасары Жағыпарбек Елубаев, қалалық ішкі саясат бөлімінің әлеуметтік мәселелер жөніндегі кеңесшісі Жанна Жибраева, Семей қалалық мәслихатының хатшысы Бейсенбек Ақжалов және қоғамдық тыңдау кеңесі мүшелерінің қатысуымен отырыс өтті. Жиында әкімшілік тарапынан азық — түлік бағасын тұрақтандыру барысы және Знаменка тірек ауылын дамыту жоспары қарастырылды.
Алғашқы сауал бойынша сөз алған кәсіпкерлік бөлімінің басшысы Бауыржан Юсупов әлеуметтік маңызы бар тауарлар мен дәрі-дәрмектердің бағасын тұрақты межеден асырмай бақылау мен мониторинг жүргізу мақсатында арнайы топ жұмыс жасап жатқандығына тоқталды:
— Құрамында қоғамдық кеңес мүшелері, мәслихат депутаттары, соғыс және еңбек ардагерлері бар жұмыс тобының бүгінгі күнге дейін 8 отырысы өтті. Үстіміздегі жылдың 12 ақпанынан бері баға тұрақтылығы тұрғысынан сенім телефонына 160 қоңырау түсіп, тұрғындардың қоңырауын қанағаттандыру барысында шаралар қолданылды. «Эмиль» сүт өнімдері бағасының көтерілуіне байланысты облыс басшысының орынбасарына хат жолданған. Бұл тұрғыда «Эмиль» ЖШС басшылығы сатып алынатын шикізаттың қымбаттауына байланысты кейбір тауарлардың бағасын 12 пайызға дейін көтеруге мәжбүр болып отырмыз деп отыр, — деген Бауыржан Юсупов бағаны тұрақтандыру барысында орындалып жатқан шаралардан халықты хабардар қылу мақсатында жергілікті БАҚ өкілдерімен тығыз байланыстың бар екендігін, халықтың көзі мен құлағы саналатын газет, телеарна журналистерімен бірге дәріханалар мен жанармай бекеттеріне рейд жүргізілгенін де тілге тиек етті.
Кәсіпкерлік бөлімі басшысының айтуынша, тұрмыстық техника бағасын тұрақтандыру үшін сауда орталықтары және кәсіпорын басшыларымен жиналыс өткен. Сонымен қатар, әлеуметтік маңызы бар тауарлардың мол қорына ие кәсіпкерлік басшыларымен де жұмыс жүргізіліп, орамжапырақ пен пиязды республикамыздың оңтүстік өңірлерінен әкелу мәселесі де талқыланып жатқан көрінеді.
«Қазіргі таңда тұрақтандыру қорының өнімдерін саудалап жатқан 55 сауда нүктесі бар»,- деген Б.Юсупов тұрақтандыру қоры тұрақты жұмыс істеп жат-қандығын, сонымен қатар, апта сайын ұйымдастырылатын аудандардың жәрмеңкелерінде көкөніс және ет-сүт өнімдері айтарлықтай төмен бағада саудаланатынын айтты.
Бағаны тұрақтандыру жөнінде меморандум да қабылданған болатын. — Меморандумға сәйкес, тұрақтандыру қоры нүктелерінде 1 сұрыпты ұн 1300 теңгеден саудалануда. «АйАр» ЖШС-мен келісімге келу арқасында 1 сұрыпты ұнның 1 келісі 54 теңгеден көтерме саудада 50 теңгеге дейін түсіп, бөлшек саудада 53 теңгеге тең келді. Ал «ИП Ермекова» көтерме-сауда фирмасымен келісімде «Аралтұздың» көтерме саудадағы келісі 35 теңге, бөлшек саудада 38 теңге тұрады. Ал қарақұмықтың келісі көтерме саудада 85 теңге болып отыр,- деген кәсіпкерлік бөлімінің басшысы 2014 жылдың ақпанында ҚР мұнай және газ министрлігі бекіткендей жанар — жағар май бағасы литріне АИ-80 – 89 теңге, АИ-92 – 115 теңге, дизелдік отын – 102 теңгеге сәйкес екендігін де атап көрсетті.
{jcomments on}Жиынға қатысушылар тұрақтандыру қоры жөнінде сауалдар қойды. Екінші ретте Знаменка тірек ауылының бүгінгі жай күйі мен даму жолдары қарастырылды. Ауылды көркейтуге 2012-2013 жылы республикалық және облыстық бюджеттен 62 млн. 675 мың теңге қаржы бөлінгенін айтқан ауыл әкімі Әбусана Қарсақбаев:
— Бөлінген қаржы ауыл игілігіне жаратылды. 23 млн. 663 мың теңгеге Орталық көшенің 1,5 километрі жөндеуден өтті. Содай-ақ, көшелер жарықтандырылды. Сонымен қатар, балаларға арналып балалар алаңы салынды. Ауыл шаруашылығы саласында 2011-2013 жылдарды «Бизнестің жол картасы-2020» бағдарламасының екінші бағыты бойынша 44 адам несие алып, мал басын көбейтті, қосымша 80 жұмыс орыны ашылды, — дей келе, ауылда жеке кәсіпкердің қолдауымен тіс емханасының ашылғанын, қазынадан бөлінген қаржыға мектеп асханасының жөнделгенін де айтып өтті.
Жиын соңында тірек ауылын көркейту жолдарын жан-жақты қарастырған кеңес мүшелері өз ойларымен бөлісіп, пікір алмасты.
