Жуырда қаламыздағы бір мұнаралы Тас мешітте ҚМДБ-ның Семей өңірі бойынша өкіл имамы Мақсат Алтыбайдың жүргізуімен діни танымдық бағытта семинар болып өтті. М.Қуанышұлы өткізген шараға жергілікті мешіт жамағаты, шариғи ілім алуға ниетті көпшілік пен дін қызметкерлері қатысты.
Семейлік имамдар мұндай бағыттағы танымдық дәрістерді қаламыздағы әр мешітте жиі өткізеді. Ондағы мақсат – атадан қалған асыл дінімізді дұрыс түсіну, ғибадат рәсімдерін дәстүрлі Ханафи мәзһабы негізінде үйрену һәм кейбір күрделі мәселелер жайлы түсінік беру, намазхан жандардың таным деңгейін көтеру болып табылады.
«Дін — ғылымның атасы, ғылым — діннің баласы» деп ақиық Мұқағали ақын жырға қосқандай, ұлтымыздың ғасырлар бойы ұлы құндылығы болып келген Ислам – тым терең ,әрі барған сайын күрделене беретін ілімдер жүйесі. Өкіл имам Мақсат Алтыбайдың айтуынша, дін негіздері жалпы сипаты бойынша фиқһ (ғибадат рәсімдерін жүргізу), ақида (сенім, пайым негізі) болып екіге бөлінеді. Ал дін ғалымдарының арасында бұл мәселелер бойынша түрлі пікірлер, тіпті қарама-қайшы ұстанымдар да бар. Ал біз, осынау көп сауалдарға жауапты тек түркі жұртшылығы үшін діни құқықтық мектеп саналатын Ханафи мәзһабы бойынша ғана іздейміз. Бұдан шығар хикмет – бір ұлтта бір мәзһаб қана болуы тиіс. Сонда, дін тұтынушы қауым арасында да ортақ көзқарас, бір түсінік пен ынтымақ-береке қалыптасады. Бұл жайт, әрине, ішкі тұрақтылығымыз бен тыныштығымыздың кепілі.
Қазіргі күні семейлік дін қызметкерлері мешітте өткізілетін дәрістерде осы бағытты негізге ала сабақ өткізуде. Мұнда келген жамағат иманның шарттары, намаздың орындалу реті, сүннетке сай дұға ету сынды мәселелер бойынша имамдардан кеңес тыңдауда. Бір мұнаралы мешіттегі бұл күнгі сауат ашу дәрісін имамдар жүргізді. Аталмыш шара бойынша ҚМДБ өкіл имамы Мақсат Қуанышұлы түсінік беріп өтті.
— Мұндай дәрістер қала мешіттерінде кешкі ақшам намазы мен құптан намазы аралығында өткізіледі. Семинарлардың берері мол. Себебі, мешітке келушілер арасында даулы пікірлер кездеседі. Кейбір бауырларымыз Ханафи мәзһабы бойынша бекітілген, намазда қолды кіндіктен төмен байлау, дұғада бет сипау тәрізді сүннетке сай рәсімдерді білместікпен жоққа шығарады. Алайда, көптеген ғасырлар бойы қалыптасқан, мәзһаб ғалымдарының ортақ көзқарасымен мақұлданған мұндай рәсімдердің орындылығы жайлы мешіт қызметкерлері дәлел мен түсінік беруде. Сауат ашу курсының аясы жыл сайын кеңейіп келеді. Өткен жылы Комсомол кентіндегі Төлеубек қажы мешітінде бір айлық діни сауат ашу курсында 150 адам білім игеріп, сертификат алып шықты. Биыл 25 адам тәмамдады. Сонымен қатар, алдағы мамыр айында жастарды дәстүрлі емес діни ағымдардан сақтандыру мақсатында ақпараттық насихаттық топ мүшелері бірқатар шаралар ұйымдастырмақ, — дейді өңіріміздің бас имамы.
{jcomments on}Мешіт қызметкерлерінің діни ағарту шараларын жүргізудегі белсенділігі жоғары. Мәселен, сауат ашу курсын бітірген бірқатар шәкірттер Алматы, Астана шаһарларындағы медреселерге жолдама алыпты.
Жалпы, бүгінгі күнде имамдардың қайраткерлігі қажет-ақ. Діни ілімге сусаған көпшілік, әсіресе албырт сезімге жылдам ерік беретін жастар көлденең келген «көк атты» уағызшының сөзіне еріп кетпей, көкейлеріндегі сауалдарын мешіт қызметкеріне қойғаны абзал. Бұл ретте дін өкілдерінің жұртшылықпен тығыз қарым-қатынаста жұмыс істеп, өңірдегі діни ахуалдың тұрақтылығын назарда ұстағаны ләзім. Ал жоғарыда айтылған, ұйымдастырылып жатқан шаралар осы бағыттағы ілкімді істің игілікті бастамасы екені анық. Атадан қалған асыл дінімізді қастерлеу — парыз. Ол бабалар аманаты. Ел іргесінің беріктігі, берекесінің кепілі болар имандылық атты ұлы қасиет ұл-қыздарымыздың бойында қазақы сипатпен көрініс тапса – нұр үстіне нұр болмақ!
Қуаныш ҚОЖАЕВ,
«Семей таңы»
