2021 жылы қаржыландырудың барлық көздері есебінен ШҚО-да жалпы саны 8 736 пәтерді құрайтын 1 057 800 шаршы метр тұрғын үй салу жоспарлануда. Бұл туралы аймақ басшысы Даниал Ахметов өзінің Instagram әлеуметтік желісінде жазды.
Оның ішінде, ағымдағы жылдың қорытындысы бойынша 124,5% өсіммен 647,1 мың шаршы метр тұрғын үй немесе 5 975 пәтер пайдалануға берілмек. Атап айтқанда, 56 көппәтерлі, 10 бірқабатты, сондай-ақ жеке инвесторлар есебінен 216 жалға берілетін және 225 кредиттік жеке тұрғын үй бой көтереді.
— Бүгінгі таңда Өскемен әкімдігі тарапынан жеке инвесторларға жер телімдері берілді. 28-ші шағын аудан аумағында 8 үйде құрылыс-монтаждау жұмыстары басталды, қалғандары бойынша дайындық жүргізілуде. Осы ретте, қала әкімі Жақсылық Мұқашұлына аптасына бір рет жеке құрылыс мекеме өкілдерімен кездесу өткізу тапсырылды. Бүгінде баспанаға үлкен сұраныс бар. Сондықтан біз барлық коммерциялық компанияларға мотивация беруіміз қажет. Әрі келесі жылы облыс орталығында коммерциялық тұрғын үй құрылысының көлемін екі есеге арттыруымыз керек, — деп жазды Д. Ахметов.
Аягөз ауданында әкімдік тарапынан жеке инвесторларға жер телімдері рәсімделіп, құрылыс-монтаж жұмыстарына дайындық жүргізілуде. Ал, Семейде ЖСҚ мемлекеттік сараптамадан шығып, «Ертіс» ӘКК-не берілді.
