1 мамырдан бастап Үржар әуежайы ұшу-қону жолағын қайта жаңарту жұмыстарын жүргізуге байланысты жабылады.
Осыған орай, Алакөл жағалауына баратын туристер үшін автобус маршруттарының және пойыз вагондарының саны артпақ. Десе де халық арасында көлік жетіспеушілігіне байланысты алаңдаушылық туындап отыр. Осы мәселені шешу үшін Нұр-Сұлтан, Алматы, Жалаңашкөл станциясына дейін қатынайтын теміржол вагоны санын сегізден онға дейін арттыру жоспарланып отыр.
Жолаушылар көлігі және автомобиль жолдары басқармасының басшысы Нұржан Жұмаділовтің айтуынша, бұл әр бағыт бойынша орын санын 352-ден 456-ға дейін арттыруға мүмкіндік береді.
— 17 маусымнан бастап аптасына үш рет Алматы — Достық бағытындағы 10 вагоны бар жаңа жолаушылар пойызы жүре бастайды. Бұл қосымша 450 орынды қамтамасыз етеді. Облысішілік қатынастар бойынша Өскемен, Семей қалаларынан Жалаңашкөл станциясына вагондар саны әр бағыт бойынша бестен жетіге дейін ұлғайтылады. Бұл орындар санын 270-тен 416-ға дейін арттыруға мүмкіндік береді, — деді Нұржан Жұмаділов.
Сонымен қатар Өскемен мен Семейден Үржар ауылына күн сайын қатынайтын автобустар санын екі есе, яғни 8-ден 16-ға дейін арттыру мәселесі пысықталды.
Басқарма басшысы Үржар ауылындағы әуежай пайдалануға берілгеннен бері күрделі жөндеу жүргізілмегенін атап өтті. Қайта жаңарту жұмыстарын жүргізу мерзімін кейінге қалдыру ұшу қауіпсіздігіне кері әсер етуі мүмкін. Бұл ретте әуежай жаңартылғаннан кейін ұшақтарды түнде де қабылдау мүмкіндігіне ие болады. Бұл келесі жаз мезгілдерінде Алакөл көлінің жағалауында демалатын туристер санын арттыруға мүмкіндік бермек.
