Облыс әкімі Даниал Ахметов аймағымыздағы бірегей мекен Ақбауыр археологиялық кешенінде болды, сондай-ақ Бестерек ауылында бой көтеретін мұражай-археологиялық кешен құрылысының жоспарымен танысты.
Көне ғасырлар көшінен сыр шертетін тарихи-мәдени ескерткіштер біздің облыста жетерлік. Солардың бірі де бірегейі – алты мыңжылдық тарихы бар, неолит дәуіріне жататын археологиялық кешен Ақбауыр. Әлі күнге зерттеліп бітпеген құнды жәдігердің ерекшелігі сол, әр тасының беті ежелгі таңбалар мен суреттерге тұнып тұр.
Айта кетерлігі, осыдан екі жыл бұрын Ақбауырда Зейнолла Самашев бастаған археологтер ерте сақ кезеңіне жататын тұрақшылық сипаты бар елді мекенді тапқан болатын. Мұндағы табылған барлық артефактілер ежелгі көшпелі сақтардың отырықшы өмір салтын жүргізгенін көрсетеді.
Биыл ғалымдар алаңды кеңейтіп, елді мекеннің тереңдігін толық қамтуды, сондай-ақ басқа учаскелерде жұмысты бастауды жоспарлап отыр. Алдағы жылдары Ақбауыр танымал туристік орынға айналатыны анық. Оған мұндағы жұмыстар барысымен жан-жақты танысқан облыс әкімі де сенім білдірді. Осы орайда айта кетсек, С.Аманжолов және Д.Серікбаев атындағы университеттердің қызметкерлері мен студенттерінен құралған жасақ келесі айдан бастап іске кіріседі.
Ал жаңа музей-археологиялық кешен салуға арналған жер учаскесі Ұлан ауданындағы Бестерек ауылында орналасқан. Жалпы ауданы 461,4 шаршы метрді құрайды.
«Бір қабатты ғимараттың құрылысын қыркүйек айында аяқтауды жоспарлап отырмыз. Дәл осы жерде Зейнолла Самашев «Алтай – түркі әлемінің бесігі» конференциясының қонақтарын қарсы алғысы келетінін жеткізді, оның да өзіндік мәні бар. Алқалы жиын осы жылдың күзінде өтеді деп жоспарлануда»,- деп жазды бұл жайында аймақ басшысы Даниал Кенжетайұлы өзінің фейсбук әлеуметтік желісіндегі жеке парақшасында.
Азамат ЕРСАЙЫН, «Семей таңы»
