Қиындық бірігіп көтерсе ғана жеңілдемек. Риддердегі ағайынның басына түскен ауыртпашылықты бірге көтерісуге ниет білдіріп, қолдау көрсетіп жатқандар арасында семейліктер де білсенділік танытуда.
Семей қаласының тұрғындары мен кәсіпкерлері арнайы шотқа 16 млн теңгеден астам қаражат аударып, гуманитарлық көмек жіберді.
Семей қалалық әкімдігінің хабарлауынша, аталмыш соманың көп бөлігін, атап айтқанда 10 млн теңгені жергілікті «Фирма Азия» ЖШС бөлген екен.
— Тек бірігіп қана біз барлық қиындықтарды жеңе аламыз. Бұл жағдайда да жерлестерімізге көмек көрсетуіміз керек. Барлық тұрғындар мен кәсіпкерлерді өрт салдарынан зардап шеккендер жерлестерімізге көмек көрсетуге шақырамын, — дейді «Фирма Азия» ЖШС директоры Сәуле Досқожанова.
Айта кету керек, қала кәсіпкерлері 15 тоннаға жуық азық-түлік жинады. «Агрофирма – Приречный» ЖШС 5 тонна пияз және 5 тонна қырыққабат бөлді. «Ай-Ар» ЖШС 350 келі 1 сұрыпты ұн, «АҚ-нан КЗ» ЖШС 250 кг ұн, «Семнан» ЖШС өз ұнынан жасалған кондитерлік өнімдерін ұсынды.
Сонымен қатар гуманитарлық көмекке «Semei Qus» ЖШС 2 санаттағы 10 қорап жұмыртқа, ал «Апрель» көп функционалды кешені 50 келі күріш, 100 келі макарон өнімдерін, 50 келі қарақұмық жармасы мен 50 литр күнбағыс майын, сондай-ақ 50 келі ұн мен қант бөлді.
Өткен аптаның соңында семейліктерден жиналған гуманитарлық көмек — екі жүк көлігі Семей қаласынан Риддердерге жөнелтілді. Айта кетерлігі, семейліктер ұйымдастырған бұл қайырымдылық шарасы әлі де жалғасып жатыр. Оған қаладағы ерікті жастардан құралған ұйымдар, жергілікті мешіт жамағаттары да атсалысуда.
Айта кетейік, арнайы құрылған «Бірлік» қайырымдылық қорына да кез келген семейлік қаражат аудара алады.
