Абай ауданы – қазақ халқын әлемге танытқан үш бірдей алыптың туған жері. Облыс әкімі Даниал Кенжетайұлы Ахметов пен аудан басшысы Жарқынбек Борашұлы Байсабыровтың жүйелі жұмысының нәтижесінде қасиетті мекен гүлденіп, көркейіп келеді.
2020 жылы ұлы Абайдың 175 жылдығын мерекелеу қарсаңында Қарауыл ауылындағы 20 жылдай уақыт бос тұрған Мамай көшесіндегі көппәтерлі 2 тұрғын үй қайта қалпына келтіріліп, оның ішінен 15 тұрғын үй ауылдағы көпбалалы және аз қамтылған отбасыларға берілді.
«Нұрлы жер» мемлекеттік бағдарламасы аясында облыс әкімі Даниал Ахметовтің бастамасымен қолға алынған «Бір қабатты шығыс» ауқымды жобасы шеңберінде жеке меншік қаражат есебінен С.Бекбосынов, Тоқтамыс көшелерінен екі пәтерлі 16 тұрғын үй бой көтеріп, пәтер кілттері ауылдағы 32 көпбалалы және әлеуметтік жағынан аз қамтылған отбасыларға табысталды.
Өткен 2020 жылы барлығы 47 көпбалалы және әлеуметтік жағынан аз қамтылған отбасы баспанаға қол жеткізді.
Биылғы жылы «Бір қабатты шығыс» бағдарламасы арқылы тұрғын үй салу жалғасын табуда. Қарауыл ауылындағы Тоқтамыс көшесінде жаңадан салынған «Абай саябағы» аумағынан екі пәтерлі 16 тұрғын үйдің құрылысы жүріп жатыр. Бірыңғай сәулеттік келбетке ие бұл тұрғын үйлердің қатары жыл сайын толығып келеді. Осылайша, бұл аумақ алдағы уақыттарда шағын ауданға айналатын болады. Жыл соңына дейін кезең-кезеңмен ауданда тағы 32 отбасы баспаналы болмақ.
«Бір қабатты шығыс» бағдарламасы аудандағы тұрғын үй мәселесін шешуге айтарлықтай үлес қосуда. Ұлылар мекенінде халықты тұрғын үймен қамту бағытындағы іргелі істер, игілікті бастамалар өз жалғасын таба бермек.
— Мен көп балалы және аз қамтылған отбасы ретінде жаңа баспанаға қол жеткіздім. Үйдің кілтіне ие болған сәттегі қуанышымды сөзбен айтып жеткізе алмаймын. Облыс басшысына, аудан әкіміне ризашылығымызды білдіреміз. Барлық шаңырақтың іші жанға, сырты малға толып, тек қуаныш болса екен», деп пікір білдірді «Бір қабатты шығыс» бағдарламасы арқылы баспанаға қол жеткізген С.Сұлтанова есімді тұрғын.
Осылайша ұлылар елінде аталмыш бағдарлама арқылы 16 тұрғын үй бой көтеріп, халық игілігіне тарту етілді. Жаңа тұрғын үйлердің еңселі шатырлары мен жарқыраған шамдары ауданымыздың ажарын арттырып тұр. Жыл соңына дейін тағы 16 үйдің құрылысы аяқталып, тұрғындар қуанышы еселене түседі деген ойдамыз.
Нұрқыз МЫРЗАХАНОВА, «Семей таңы»
