Елімізде 25 мамырдан бастап картоп, сәбіз, сүт және айран бағасының өсуі байқалды. Бағаның шарықтауы өз кезегінде тұрғындардың наразылығын тудырып отыр.
Семей қаласының кәсіпкерлік бөлімінің басшысы Данияр Шәкәрімов жуырда баспасөз мәслихатын өткізіп, бағаның өсу себептері мен бағаны тұрақтандыруға қатысты атқарылып жатқан шаралар туралы айтып берді.
— Көкөніс бағасының өсуі тұрақтандыру қоры өнімдерінің аяқталуына, өткен жылғы өнім қорының қысқаруына, оңтүстік өңірлерден және көрші мемлекеттерден көкөніс жеткізудің аяқталуына байланысты орын алып отыр, — дейді Данияр Шәкәрімов.
Кәсіпкерлік бөлімі басшысының айтуынша, қалада өндірілетін сүт өнімдерін өңір тұрғындарының қажеттілігін қамтамасыз етпейді. Сүт өнімдерінің жетіспейтін көлемі Бородулиха және Бесқарағай аудандарының шаруашылықтарынан, Өскемен қаласындағы»Восток Молоко», «Эмиль», Павлодар қаласындағы «Молком» сүт өңдеу кәсіпорындарынан жеткізіледі. Бағаларды тұрақтандыру үшін бөлшек сауда кәсіпорындарымен әлеуметтік маңызы бар азық-түлік тауарларына 10% — дан аспайтын ең төменгі сауда үстемесін қолдану бойынша келісімдер жасалады.
Кәсіпкерлік бөлімінің басшысы биыл сатып алынатын картоп көлемі өткен жылмен салыстырғанда 50 пайызға артатынын айтты.
– 2021-2022 жылдарға Семей қаласы үшін 3500 тонна көлемінде 2021 жылғы егіннің жеміс – көкөніс өнімдерін, оның ішінде 1500 тонна картоп (өткен жылмен салыстырғанда көлемі 50% – ға артты), 850 тонна қырыққабат, 400 тонна сәбіз, 750 тонна пияз сатып алу жоспарланып отыр. Ағымдағы жылдың наурыз айынан бастап Семей қаласында жұмыртқа өндіру бойынша «SEMEI QUS» ЖШС құс фабрикасы жұмыс істей бастады. Бірінші санаттағы тауық жұмыртқасының бағасы 220 теңгеден, екінші санаттағылар150 теңгеден сатылуда, – деді Шәкәрімов.
Бүгінгі күні бекітілген кестеге сәйкес, қалада азық-түлік бағасының негізсіз өсуіне жол бермеу бойынша мониторингтік топ жұмысын жалғастыруда.
