Нұр-Сұлтан қаласы әкімдігінің Музыкалық жас көрермен театры ҚР Тәуелсіздігінің 30 жылдығына орай Нұр-Сұлтаннан Қарауылға дейін (Нұр-Сұлтан – Семей – Бөрілі– Қасқабұлақ– Ақшоқы– Жидебай– Қарауыл) мәдени сапарға шығып, 21 маусым күні Семей қаласына аялдады.
«Абай баба ізімен» атты мәдени сапардың басты мақсаты – ұлы ақынның ізі қалған киелі жерлермен, жәдігерлермен, қасиетті топырақтың рухани, тарихи-мәдени құндылықтармен тереңірек танысып, жас ұрпақтың бойында туған жерге деген сүйіспеншілік сезімін қалыптастыру.
Экспедиция мүшелері алдымен Семейдегі Шәкәрім университетіне ат басын соғып, оқытуыш құраммен кездесіп, пікір алмасты.
Сапар барысында Музыкалық жас көрермен театры Абай театрында М.Әуезовтің «Абай-Тоғжан» музыкалық драмасын көрерменге ұсынды. Қойылымның инсценировка авторы Мирас Әбіл, қоюшы-режиссері Қазақстанның еңбек сіңірген қайраткері Асхат Маемиров.
«Абай-Тоғжан» музыкалық драмасының арқауы — Абай ғұмырының бозбала кезеңі. Жас Абайдың жүрегінде оянған алғашқы махаббат, көкірегінде туған тұңғыш жыры әуезді әнге айналады. Тоғжанға деген іңкәр сезім өмірге деген құштарлыққа ұласып, Абайдың адамзатқа деген асқақ махаббатының темірқазығына айналды. Абай поэзиясындағы ойлы жырлар мен есті әндер орындалатын қойылымда ұлтымыздың құндылықтары сахна биігіне көтеріледі. Ғашық Абайдың әлемі көрерменге «Ғашықтың тілі – тілсіз тіл» екендігін ұқтырады.
Қойылымнан кейін Қазақстанның еңбек сіңірген қайраткерлері Нұрлан Өнербаев, Қанат және Света Айтбаевтар, Ұлықпан Жолдасов, Дина Хамзина сынды өнер жұлдыздарының қатысуымен «Ұлы дала сазы» атты концертік бағдарлама өтті.
