Балалардың жаңа оқу жылын тың күшпен бастаулары үшін, толыққанды демалып, денсаулықтарын нығайтулары қажет, оған қолайлы уақыт – жаз айлары. Жаз айларын мектеп оқушылары ерекше күтетінін бәріміз де білеміз. Әрбір бала жазғы демалысты қызықты өткізуді армандайды. Сабақ барысында берілетін демалыс күндері жаз кезіндей еркін демалуға мол мүмкіндік бере алмайды. Жазғы демалыс – мектеп оқушыларының, жалпы, физиологиялық, сана-сезімдік, дүниетанымдық тұрғыда даму, жетілу кезеңі.
Жазғы балалар лагерьлері мектеп жанындағы күндізгі лагерьлер мен сауықтыру лагерьлері болып бөлінетінін жақсы білеміз. Сәл ертерек уақытта еңбек-тынығу лагерьлері деген болған. Балалар бір мезгіл лагерь маңында жұмыс істейтін еді, белгілі мөлшерде табыс та табатын.
Тәрбиенің үлкені – еңбек. Бала еңбек етіп үйренуі тиіс. Еңбек денені шынықтырып қана қоймай, сонымен бірге адам бойындағы көптеген жақсы қасиеттердің қалыптасуына да бірден-бір себепші болады. Ауызбірлікке, төзімділікке, ұқыптылыққа, қайырымдылыққа үйретеді.
Қала сыртындағы лагерьлерде балалардың жазғы демалысын ұйымдастыруда басты назарды баланың денсаулығын нығайту мен демалуына ғана емес, сонымен қатар физикалык және психологиялык жүктемеден арылып, өзі қалайтын іспен шұғылдануына, оның өз дегенін іске асыруына себепші болатын, тәжірибесін толықтыруға жағдай тудырып, мүмкіндік берер тиімді әдістерге зер салу қажет. Тәрбиелік жүйе шын ниетпен балажандыққа негізделуі тиіс, сонда балалар демалыстарын қызықты, естен кетпестей өткізсе, ал ересектер шығармашылықпен жұмыс істейді. Лагерь тәрбиешілерінің алдындағы жауапкершілік өте үлкен. Демалыстың толыққанды, қызықты өтуі тәрбиешілердің кәсіби шеберлігіне педагогикалық мәдениетіне, балаларды кызықтыра білуіне байланысты. Бұл ретте халқымыздың ұлттың ойындарының алар орны ерекше. Қазақтың қай ойынын алап қарасаңыз да, тапқырлық пен табандылықты, біліктілікті талап етеді. Ұлттық ойындарымыз тек ойын-сауық емес, ол – спорт, ол – өнер, ол – шаруашылық істерінде маңызы бар тәрбие құралы. Сондықтан баланың зеректігін арттырып, зейінін ашатын, шынықтыратын, ширықтыратын сан түрлі ұлттық ойындарды жазғы демалыс уақытында ойнатуға болады.
Семей қаласы білім бөлімі мамандарының айтуына қарағанда, биылғы жазғы каникул кезінде жасөспірімдердің демалуы мен денсаулығын түзеу бағытында көптеген шаралар ұйымдастырылыпты. Жазғы демалысты ұйымдастырудың республикалық тұжырымдамасына сәйкес қалалық комиссия құрылып, іс-шаралар жоспары жасалған. Аталған комиссияның құрамына білім саласы мен Бородулиха және Бесқарағай аудандық санитарлық-эпидемиологиялық бақылау және өрт қауіпсіздігі басқармаларының өкілдері тартылған.
Биылғы жылы қала сыртындағы лагерьлерге бюджеттен 4 млн 375 мың теңге бөлініпті. Әлеуметтік жағынан әлсіз отбасылардың балаларының демалысы үшін, атап айтсақ 1174 балаға бюджеттен 54,6 млн теңге қарастырылған. ҚР бас санитарлық дәрігерінің 2020 жылғы №67 қаулысына сәйкес, жолдама құнына ПТР — тестінің құны да енгізілген.
Тегін жолдамаларды рәсімдеу ЭҚО (электронды қызмет орталығы) арқылы жүзеге асырылады.
Жазғы демалыс балаларды сауықтыру және жұмыспен қамту сынды 2 бағытта ұйымдастырылуда. Екінші бағыт бойынша ауыл мектептері шаруа қожалықтарымен әріптестік орнатуды жалғастыруда. Оқушылар күзгі егін жинау барысында Приречный ауылындағы «Дар», Мұздыбай ауылындағы «Арман» шаруа қожалықтарында жұмыс істейді. Ата-аналарының келісімімен балалардың жас мөлшерлері, жұмыс уақыты және еңбек қауіпсіздігіне қатысты шектеулер еңбек заңнамасындағы нормаларға сәйкес белгіленеді.
Жазғы лагерьлер – тек демалыс орны ғана емес, үлкен тәрбие мен үгіт-насихат құралы. Мәселен, балалар онда демалып қана қоймай, денсаулығын түзейді, қоршаған ортаны танып, еңбекке араласады, жаңа достар табады. Туған жерінің орман-тауын, өзен-көлін, даласын көріп-білу және оның сұлулығын сезіну әрбір баланың бойында туған табиғатын аялай сүю, қорғау сезімдерін оятып, ұлттық сананың қалыптасуына алғы шарт болады. Айналып келгенде, балаға бүгінгі жасалатын қамқорлық елдің ертеңін ойлау мақсатынан туындайтыны түсінікті.
Ұзақбек АТАНБАЕВ, «Семей таңы»
