5 тамыз күні қалалық ақпарат орталығында ШҚО Денсаулық сақтау басқармасы басшысының орынбасары Думан Берікұлы, санитарлық-эпидемиологиялық бақылау басқармасының орынбасары Нұржан Ноғайбаевтың қатысуымен баспаөз конференциясы өтті.
Думан Берікұлының айтуынша, бүгінгі күні Семей қаласында 346 науқас коронавирустан емделуде.
— Қазір елімізде жағдай күрделі. Covid-19 жұқтырғандар саны күннен күнге өсіп барады. ШҚО-да 4000-нан, Семей қаласында 1000-нан астам төсек-орын дайындалды. Дәрі-дәрмектердің, қорғаныш киімдердің екі айлық қоры жинақталды. Бірақ халықтың өз денсаулығын сақтауға деген жауапкершілігі қалыптаспайынша, індетті жеңу қиын. Дельта штамы 7-8 күннің ішінде науқасты ауыр халге жеткізеді. Бұдан сақтанудың жалғыз жолы – екпе алу, — деді Думан Берікұлы.
Думан Берікұлының айтуынша, Семей қаласында вакцинаның І компонентін 110 мыңнан астам адам, ІІ компонентін 83 894 адам алған.
— Семей халқының жалпы санын ескерсек, бұл қанағаттанарлық деңгей емес. Сондықтан халықты екпе алуға, сақтық шараларын сақтауға, адамдар көп шоғырланған жерлерге бармауға шақырамыз. Екпе егу және жылжымалы пунктер сағат 8.00-22.00 аралығында жұмыс істейді. Қалада балалардың 3%-ы, 40 жасқа дейінгі адамдардың 14%-ы, 40-60 жас аралығындағылардың 31%-ы, 60 жастан жоғары адамдардың 55%-ы коронавирус жұқтырған. Былтырғы жағдаймен салыстырғанда биыл індеттің жас талғамай отырғанын аңғаруға болады,- деді Думан Берікұлы.
Баспасөз конференциясы соңында, Думан Берікұлы індетті жеңудің жалғыз жолы вакцинация екенін айтып, халықты екпе алуға шақырды.
Жадыра ТӨЛЕГЕНҚЫЗЫ, «Семей таңы»
