Өткен жұма күні Семей ақпарат орталығында көктемгі егістік жұмыстарын жүргізуге дайындық барысы туралы қалалық ауыл шаруашылығы және ветеринария бөлімі өсімдік секторының меңгерушісі Тоқтарғажы Стамбековтің қатысуымен баспасөз мәслихаты өтті.
Тоқтарғажы Стамбеков өз сөзінде Семей өңірі бойынша биылғы егістік алқаптарының құрылымдары анықталғанын, сонымен қатар, үстіміздегі жылы 127 44 гектар алқапқа, атап айтқанда 1296 гектарға дәнді-дақылдар (күздік егілетін 407 гектар қара бидайды қоса есептегенде), 3310 гектарға картоп, 1370 гектарға көкөніс, 80,7 гектарға бақша дақылдары, ал, 600 гектарға күнбағыс, 390 гектарға дәндік жүгері, 120 гектарға сүрлемелік жүгері, 5698 гектарға көпжылдық және бір жылдық шөптер егу жоспарланып отырғанын айтты.
— Семей өңірінде тұқым шаруашылығын дамыту мақсатында біршама жұмыстар жасалуда. Бүгінгі күні өңірде картоптың жоғары өнімді тұқымдарын өсіретін 2 ауылшаруашылық құрылымы бар. «Агрофирма Приречное» ЖШС мен «Мұздыбай-1» шаруа қожалығы картоп тұқымдарын өндіретін және сататын тұқым шаруашылығы мәртебесі бар, — дей келе, Т.Стамбеков, — «Мұздыбай-1» шаруа қожалығы 2013 жылы 611 картоптың І, ІІ, ІІІ репродукциялы тұқымдарын сатса, үстіміздегі жылы 1070 тонна картоп тұқымын сатуға дайындады. ШҚО-ның 17 шаруашылығы жоғарыда аталған шаруашылық өндірген картоптың тұқымын пайдаланыпты. Ал, «Агрофирма Приречное» ЖШС өздері өндірген картоп тұқымын егуге пайдалануды көздеп отыр, — деп атап өтті.
Сонымен қатар, Тоқтарғажы Аюбайұлы биылғы жылы өңірдің шаруашылық құрылымдары толық көлемде сапалы тұқыммен қамтамасыз етілетіндігін, барлық тұқымдардың себуге жарамдылығын анықтау мақсатында «Казагроэкс» АҚ-ның зертханасына белгіленген кесте бойынша тексеруден өткізуге жіберілетінін, ал, көкөніс дақылдарының элиталық сұрыптарының тұқымдары қапталған түрде Голландия мен Ресейден әкелінетінін, ағымдағы жылы егілетін барлық тұқымдар 1-2 санатты және ІІІ репродукциядан төмен болмайтынын жеткізді.
{jcomments on}- Көктемгі дала жұмыстарын жүргізуге Семей өңірінің ауылшаруашылығы құрылымдарының техникалары жеткілікті, соның ішінде барлық тракторлардың саны 689 болса, оның 624-і дөңгелекті, ал, қалған 65-і шынжыр табанды трактор. Сондай-ақ, 76 соқа, 63 культиватор, 32 тұқым сепкіш және 264 жүк көлігі бар. Қазіргі уақытта жөндеу жұмыстары жүргізіліп жатыр. Мысалы, тракторлардың 98 пайызы, соқалардың 100 пайызы, культиваторлардың 100 пайызы, тұқым сепкіштердің 100 пайызы, жүк көліктерінің 98 пайызы көктемгі дала жұмыстарына дайын. Сонымен қатар, жаңа технологияларды енгізу қолға алынуда. Өткен жылы 8 шаруашылық 179,4 гектар алқапта тамшылатып суару әдісімен жұмыс істеді. Ағымдағы жылы тамшылатып суару әдісімен жұмыс істеуді тағы да 30 гектар ұлғайту жоспарланып отыр, — деп атап өтті Тоқтарғажы Аюбай-ұлы өз сөзінде.
Нұрдәулет КӘКІШЕВ,
«Семей таңы»
