Шығыс Қазақстан облысының әкімі Даниал Ахметов жуырда қала, аудан басшыларымен шағын және орта бизнес өкілдерінің Ashyq жобасына қатысуына байланысты жиын өткізді.
Бұл жайлы аймақ басшысы өзінің Facebook әлеуметтік желісіндегі жеке парақшасында жазды.
— Кәсіпкерлердің жұмысын тұралатып алмай, халықтың да қауіпсіздігін қаперден шығармай, қалыпты өмірді қамтамасыз етудің жалғыз жолы – Ashyq жобасы. Осы сияқты бағдарламалар мен қосымшалар әлемнің барлық өркениетті елдерінде қолданылуда. 20 тамызға дейін қалалар мен аудандардың әкімдері кәсіпкерлермен кездесіп, Ashyq жобасына қаншасының қатысып жатқандығын, қалғандарының дайындығы қай деңгейде екендігін, бағдарламаға қосылуда қандай да бір кедергілер бар ма, соның бәрін анық көрсетулері тиіс, — деді Даниал Ахметов.
Жалпы, қазіргі таңда өңірімізде халықты вакцинациялаудың қарқыны жақсы. Бүгінгі таңда күніне 13 мыңға жуық адамға вакцина салынуда.
— Алдағы уақытта күніне 16 мың дозаға дейін жетеді деген жоспар бар. Біз тек осылай ғана коронавирус инфекциясының таралуын төмендетіп, жақындарымызды індеттен құтқара алатынымызды ескеруіміз керек, — деді облыс әкімі.
Сөз орайында айта кетсек, Ashyq жобасы бойынша облыста 8441 мекеме жұмыс істеп жатыр екен. Оның ішінде ресми қатысушылар – 8370, тестілік режимдегілер – 171. «Ashyq көшбасшылары» статусын беру алгоритміне сәйкес, ҚР бас мемлекеттік санитарлық дәрігерінің ағымдағы жылғы 26 тамыздағы №37 қаулысымен Ashyq жобасының 217 қатысушысы көшбасшы болып танылды.
Әйтсе де жүргізілген тексеру барысында 73 объектіде шектеу шараларының бұзылуы анықталған. Сондай-ақ жобаға қосылған нысандарға «қызыл» және «сары» статусы бар 3669 адамның келгені тіркелді. «Сары» статусы анықталған тұлғаларға қатысты санитарлық-эпидемияға қарсы және санитарлық-профилактикалық іс-шаралар жүргізу туралы 1900-ден астам қаулы шығарылды. «Қызыл» статусы бар 78 адамға қатысты әкімшілік шаралар қабылданған. ҚР ӘҚБтК-нің 425-бабының 1-бөлігіне сәйкес, аталған азаматтарға жалпы көлемі үш млн теңгеден астам айыппұл салынған.
Қуаныш ЖОЛЫМБЕТ,
«Семей таңы»
