Облыстық әкімдікте өткен аппараттың кеңейтілген кеңесінде тұрғын үйді пайдалануға беру жоспарын жүзеге асыру мәселелері қаралды. Сондай-ақ қаланың сәулеттік келбеті, кәсіпкерлік субъектілерінің іргелес аумағының санитарлық жағдайы да талқыланды.
Жиын барысында облыс әкімі Даниал Ахметов нысандарды салуға жергілікті құрылыс компанияларын белсенді түрде тартуды тапсырды. Бұл тек тұрғын үйлер ғана емес, балабақшалар мен мектептер құрылысының көлемін кеңейтуге мүмкіндік береді. Аймақ басшысы сонымен қатар стихиялық құрылыстарды тоқтату мақсатында жер учаскелерін сатуға шығаруды тоқтатуды да тапсырды. Ауылдық округтерді аралау нәтижелері бойынша бюджеттік бағдарламаларға тұрғындардың тілектері енгізілетін болады: бұл балалар алаңдарын, демалыс орталықтарын, медициналық пункттерді салу және т.б.
«Өкінішке орай, қалада сәулеттік бытыраңқылықтың көрінісі байқалады. Бірінші қабаттарда орналасқан коммерциялық объектілер жеке дизайн бойынша рәсімделген, яғни бірыңғай сурет, жалпы композиция жоқ. Сонымен қатар сауда үйлері мен басқа да бизнес нысандарының сыртқы келбетін реттеу мақсатында ғимараттарды безендірудің бірыңғай дизайнын әзірлеу және қаламыздың қайталанбас келбетін көрсету бойынша ұсыныстар енгізуді күн тақырыбына қою қажет.
Қалалық көгалдар мен алаңдарды шағын сәулет формаларымен безендіру үшін оқу орындарының дизайн бөлімдерінің түлектерін дипломдық жобаларымен тарту туралы шешім қабылданды. Әлеуметтік әріптестіктің бұл түрі жастарды қызықтырып, өздерінің шығармашылық әлеуетін іске асыруға және қаланың өмірі мен тарихына қатыстылығын сезінуге мүмкіндік береді деп ойлаймын», — деп атап өтті облыс әкімі Д.Ахметов.
Айта кету керек, қазіргі уақытта аппараттық жиналыстар ресми іс-шара емес. Бүгінде бұл қалалықтардың тілектері мен пікірлері ескерілетін диалог алаңына айналған.
«СТ» ақпарат
