Шығыс Қазақстанда денсаулық сақтау саласын дамытуға ерекше назар аударылып отырғаны белгілі. Жақын арада облыс орталығында бес бірдей емхана ашылмақ.
1 желтоқсан күні Өскемен қаласының бұрынғы сүт тағамдары асханасының ғимаратында орналасқан жаңа емхана пайдалануға берілмек. Бұл туралы облыс басшысы Даниал Ахметов өзінің инстаграм әлеуметтік желісіндегі жеке парақшасында жазды.
Қазірге күні құрылыс компаниясы 25 қарашаға қарай жөндеу жұмыстарын толығымен аяқтау үшін қарқынды еңбек етіп жатыр. Даниал Кенжетайұлының айтуынша, медициналық мекемеге түрлі ауруларды жедел диагностикалауға және емдеуге мүмкіндік беретін заманауи жабдықтар орнатылады. Сонымен қатар емхана PACS жүйесіне қосылады. Ол жасанды интеллект көмегімен файлдарды мұрағаттау және таратудың медициналық жүйесі, бұл күрделі жағдайларды талдауға мүмкіндік береді екен.
Бүгінгі таңда медициналық қызмет көрсету жеке клиникаларда аса қымбатқа түседі, сондықтан жақын арада Өскемен қаласында бес бірдей емхана ашылады, олардың екеуі үшін ғимараттар таңдалып та қойылған көрінеді. Барлығы да қажетті медициналық техникамен толық жабдықталатын болады. Бұл емханалардағы кезекті азайтып, дәрігерлердің сапалы медициналық қызмет көрсетуіне септігін тигізетіні анық.
Облысымызда денсаулық сақтау саласын дамытуға ерекше назар аударылып отыр.
Өз тілшіміз
