Өткен жұма, 8 қазан күні қала әкімі Бақытжан Байахметов «ПОСЖБ» ЖШС ауданындағы жолға күрделі жөндеу жүргізуді өтінген кәсіпкерлердің бастамашыл тобымен кездесті.
Аталған аудандағы ондаған кәсіпорында үш мыңға жуық адам жұмыс істейді. Бірақ әлі күнге дейін мұнда жол төсемі жоқ. Көктемде батпақ, ал жазда шаң басып жатады. Жолдың сапасы сын көтермегендіктен, мұнда қоғамдық көліктер де жүрмейді. Кәсіпорын қызметкерлері жұмысқа бару қиын екенін айтып шағымданған еді.
Қала әкімімен кездескен кәсіпкерлер қолдарынан келгенше көмек көрсетіп, жол беті асфальтталғаннан кейін көшедегі тәртіпті сақтауға дайын екендерін айтты.
— Шұңқырларды жөндеу жұмыстарын жүргізу мүмкін емес. Себебі жолдың түбінде жол кескіштерін бұзатын бетон жатыр. Сондықтан басқа әдісті таңдау керек. Мен жауапты бөліміге тиісті тапсырма бердім. Қалалық мәслихат сессиясында бюджетке түзетулер енгізу және алдағы жөндеу жұмыстарына қаражат бөлу мәселелерін қарастырамыз. Сондай-ақ көшені жарықтандырып, іргелес аумақтарды жақсарту қажет. Бұл мәселені бақылауда ұстаймын,- деді қала әкімі Б.Байахметов.
«СТ» — ақпарат
