Бүгінгі таңда еліміз бойынша тұрғылықты халықты вакцинациялау жұмыстары қарқынды жүріп жатыр. Еліміздің барлық аймақтары тәрізді ел шығысында да коронавирусқа қарсы екпенің барлық түрі қол жетімді. Дегенмен келесі жылдан бастап коронавирусқа қарсы шетелдік вакциналар салына бастайды. Әйтседе, мұндай екпе түрлері – ақылы.
Денсаулық сақтау министрі Алексей Цой Қазақстанда шығарылмайтын коронавирусқа қарсы вакциналар болашақта ақылы түрде салынатынын айтты. Орталық коммуникациялар қызметінде өткен онлайн брифингте тілшілер ревакцинация кезінде қолданылатын вакциналар туралы сұраған болатын.
Ведомство басшысы Қазақстанда тіркелген вакциналарды шектеу жоспарланбағанын айта келіп, бірқатар шетелдік вакцина түрлерін азаматтар өз қаражаты есебінен ғана қолданатынын түсіндірді. Яғни Спутник V және QazVac вакцинасынан басқа екпелерді қосымша, ақылы негізде салдыруға болады деген сөз. Қазір фармкомпаниялар бұл мәселені пысықтап жатыр.
Осы орайда тоқтала кетсек, бүгінгі таңда Семей қаласы бойынша вакцинациялау жұмыстары қарқынды жүргізілуде. Бір ғана мысал, шаһардағы «Победа» емханасында вакцинаның бірінші компонентін 6000-нан астам қала тұрғыны алса, ал екіншісін-5000-нан астам адам салдырған. Бұл туралы жуырда өткен брифингте аталмыш емхананың жалпы практика дәрігері Эльмира Әбішева айтты.
— Емханада вакцинаның екі түрі қолданылады. Олар «QazVac» және «Спутник V». Бірінші компонентпен 6113 адам егілсе, ал екінші компонентті – 5223 адам алды. Әрине, температура мен бас ауруы түрінде кейбір жанама әсерлер бар. Кез-келген вакцина сияқты оның жеңіл негізде реакциясы болады. Вакцинация 18 жасқа дейінгі азаматтарға, жүкті және бала емізетін аналарға, аллергиясы және созылмалы аурулары бар адамдарға, сондай-ақ дәрігердің медициналық тексерісінен өтпеген адамдарға негізделмейді. Қазіргі уақытта қаладағы эпидемиологиялық жағдайдың тұрақтылығын сақтау мақсатында әлеуметтік қашықтықты және медициналық бетперде киюді назардан тыс қалдырмау керек, — деп атап өтті өз сөзіндеЭльмира Әбішева.
Ал, ШҚО әкімдігінің соңғы мәліметіне сүйенсек, 25 қазандағы жағдай бойынша өңір халқының 83,2%-ы коронавирусқа қарсы вакцинаның бірінші компонентін салдырған. вакциналау процедурасын толық аяқтағандар үлесі — 72,3%-ды құрап отыр.
«СТ» — ақпарат
