Кез келген елдің рухын аспандатып, мерейін өсіріп тұратын ұлы іс-өнер. Құдіреті, тылсымы, қасиеті тұтас бір ұлттың бет айнасы. «Ел ішінде өнер көп, өнерді тапқан шебер көп» дейді халық даналығы. Иә, өнер көп, соның ішінде театр өнері ерекше. Адамның жан дүниесіне терең бойлап, ішкі рухани сілкініске себепкер болатын, жүректің нәзік қылын қозғап өтетін, ән де, би де, керкем сөз де біртұтас мағына үстейтін, ерекше эмоциялар-ға толы, жанды өнер — тағы театр. «Өнер адамды асқақ сезімге бөлеуге, адамның жан дүниесін нұрландырып, байыта түсуге, ал өмірдің өзін кемелдендіріп, игілік етуге тиіс»-дейді П. Корин.
Кез келген өнер елдік мүддемен ұштасып жату керек. Өнер ұлттың айнасы болғандықтан елдің өрлеу, өркендеу мақсатында жұмыла көтерген жүгіне білек сыбана кіріскені абзал. Нақтырақ айтқанда, саясат сахнасы мен өнер сахнасының саңлақтары, елдік сана, патриоттық рух кеңістігінде бір-біріне дем берсе, сол елдің мәдениеті мен өркениеті көп жұрттан көш ілгері болады.
Елбасының «Қазақстан жолы-2050: Бір мақсат, бір мүдде, бір болашақ» атты Жолдауының ай-қын мақсаттары мен нақты бағыттарын, келешек үшін келелі істерін жетілдіру жұмыстарын, «Мәңгілік Ел» идеясын насихаттау барысында, шалғайдағы аудандардың, ауыл-аймақтың хал-қымен жүздесіп, жанды өнермен сусындатып, театр өнерін халыққа паш ету мақсатында Семейдің Абай атындағы музыкалы драма театры, осы аталған театрдың директоры Б. Төлековтің бастауымен шығармашылық ұжым Күршім ауданының Сарыөлең, Бурабай ауылдарына Қатон-қарағай ауданының Қатонқарағай, Жамбыл ауылдарына гастрольдік сапармен сәтті барып қайтты.
{jcomments on}Қаладан шалғайда жатқан, өнер десе ішкен астарын жерге қоятын ауылдағы патша көңілді жұрттың назарына М. Әуезовтің «Еңлік-Кебек», Ғ. Мүсіреповтің «Қозы Көрпеш-Баян сұлу», С. Тұрғынбекұлының «Абай — Біржан» Ә. Нұрша-йықовтің «Махаббат, қызық мол жылдар» қойылымдары және концерттік бағдарлама ұсынылды. Өнерге сусаған жұрт концерттік залға лық толып, театр әртістеріне ерекше қошемет көрсетті. «Өнер бір мақсатқа қызмет етуге тиіс. Ол мақсат- адамдардың тамаша нәрсені тануына, өмірге ынтықтығын одан сайын арттыруға көмектеседі»-дейді Р. Рент. Ендеше, театр өнерпаздары шалғайдағы ағайындардың көңіліне хош силап, көктем гүлін жүректеріне егіп қайтты. Тамаша кездесуге ұйымдастырушылық көрсеткен ауданның басшыларына театр ұжымы атынан алғыс білдіреміз.
Мерей ҚАРТОВ, Абай атындағы музыкалы драма театры, әдебиет бөлімінің меңгерушісі.
