Осыдан ширек ғасырдан астам уақыт бұрын, Кеңес өкіметі келмеске кетіп, егемендік алдық деп бөркімізді аспанға атып, жер атаулыны қолынан келгендер қонышынан басып, бөлшектеп-бөлшектеп жатқанда халық әнінде айтылатындай: «Боз жорға алма мойын ішін тартты, боларын бір сұмдықтың біліп едім»- деп «Бір сұмдықты» сезгендей, еліміздің бас газеті — «Егемен Қазақстанға» «Жерсіз қалған қазақтар», «Жер дауы» деген толғанысты тақырыптарға мақалалар жариялаған едім.
Басшылардың көкейін кернеген құрт жайылмай тұрсын ба? Сатылатын жер сатылып кетті. Және кабинетке үйренген сол кездің байлары жерді өзіне таяу, ауыл маңынан алғанын қайтерсіз. Тарбағатай ауданына қарасты 17 ауылдық округтің бәрі де осындай күй кешті. Қарапайым халық сүтін сауып алып сонымен күн көріп отырған жалғыз сиырына жайылатын өріс таппай, көктегі құдіретке қолын жайып қалды.
«Құдай деген құр қалмайды» деген халық сенімі де рас екен. Қазақ парламантінің соңғы шыққан қаулысы бір жаратушының сыйы іспеттес болды. Аталған қаулыда ауыл маңындағы жерді халыққа қайтару керек, иелері бермесе мәжбүрлеп алу керек деген шаралар көзделген болатын. Ол бір деңіз. Қазақстан халқына «Халық бірлігі және жүйел реформалар – ел өркендеуінің берік негізі» атты Жолдауын жариялаған ҚР Президенті Қасым-Жомарт Тоқаев тағы бір үміт отын жаққандай болды.
Мемлекет басшысының Жолдауын тікелей эфирден тыңдап, газеттен де оқып шықтық. Президент Жолдауының басым бөлігі дағдарыстан кейінгі экономикалық және әлеуметтік мәселелерге арналған. Ашығын айту керек, ҚР Президенті еліміздің дамуын жылдамдатуда батыл шаралар қабылдауға шақырды. Маңызды шаралардың қатарында жоғарыда біз сөз еткен жер мәселесі де бар. «Жайылымдық жерді тиімді пайдалану да өте маңызды. Қазір мал жаятын жерге шаруалардың қолы жетпей жүр. Өйткені, мұндай алқаптарды кейбір белгілі адамдар иеленіп алған. Тіпті, оны адам аяғы баспайтындай етіп қоршап тастаған. Әкімдер түрлі себептерді сылтауратып, ықпалды адамдардың ығына жығылып, бұл мәселені шеше алмай отыр. Үкімет құзырлы органдармен бірлесіп, осы ахуалды өзгертетін батыл шаралар қабылдауға тиіс. Жеке қосалқы шаруашылықтардың малын жайылымдық жермен қамтамасыз ету мәселесіне айрықша назар аудару қажет» деді Қасым жомарт Тоқаев. Міне, бұдан артық қандай пәрмен қажет! Халықтың, әсіресе, ауыл-аймақ жұртының Тәңірден тілегені де осы ғой! Ендігі жерде осы тапсырманы орындау ғана қалып отыр. Мемлекет басшысының тапсырмасы қай жерде қалай орындалатынын құдіреті күшті уақыт қана көрсетеді.
Мейрам ОРАЛОВ,
журналист.
Тарбағатай ауданының құрметті азаматы.
