Жуырда облыстық әкімдікте аймақ басшысы Даниал Ахметов құрылысы 2022-2025 жылдарға жоспарланған өтпелі жобалар мен тұрғын үй жобаларын іске асыру жөнінде арнайы кеңес өткізді. Басқосу барысында аталмыш сала бойынша алдағы жылдары орындалатын жұмыстарға қатысты бірқатар мәселелер талқыланды.
Даниал Кенжетайұлы атап өткендей, бүгінгі таңда 171 нысанның жобалық-сметалық құжаттамасы әзірлену сатысында, ал бұл дегеніміз 650 мың шаршы метрден астам тұрғын үй. Естеріңізге сала кетсек, биыл аймағымыз бұл бағытта алғаш рет миллионыншы белгіден асты. Ал соңғы жылдардағы көрсеткішке сәйкес, Семей қаласы құрылыс қарқыны бойынша алғаш рет облыс орталығын басып озды. Осы көрсеткішті төмендетпей, алдағы жылдарға ұтымды жоспар қою керек.
— Өңірде «Бір қабатты Шығыс» бағдарламасы жақсы жолға қойылған, коммерциялық және несиелік үйлер салынуда. Өйткені сұраныс жоғары. Қаржыландыруды бірінші болып биылғы жылы жақсы нәтижелер көрсеткен аудандар алатынын атап өткім келеді. Сондай-ақ біз еліміздің басқа қалалары мен өңірлерінен құрылыс компанияларын осы жылы қайтадан тартуға дайынбыз, — деп атап өтті облыс әкімі.
Сонымен қатар аймақ басшысы әлеуметтік және мәдени объектілер салуды жоспарлау, оның ішінде барлық қажетті инженерлік коммуникацияларды жүргізуге 2023 жылы қандай қосымша қаржыландыру қажет екенін есептеу қажеттігін де еске салып өтті. Облыс басшысының айтуынша, қарқынды бәсеңдетпеу керек және 2022-2025 жылдар аралығында жыл сайын кемінде 700 мың шаршы метр тұрғын үй салу маңызды болып отыр.
Осы орайда айта кетсек, коммерциялық тұрғын үй құрылысы аймақтағы перспективалы бағыттардың бірі болып саналады. Аймағымызда құрылыс қарқыны жыл сайын артып келеді. Оны статистикалық деректер дәлелдейді. Мәселен, 2019 жылы ШҚО-да 32 мың шаршы метр коммерциялық тұрғын үй салынған. Ал биылғы көрсеткіш айтарлықтай жоғары. Жалпы ауданы 244 мың шаршы метрді құрайтын 36 үй тұрғызылған.
— Өңірде құрылыс жаңа схема бойынша жүзеге асырылады. Мемлекет барлық инженерлік-коммуналдық инфрақұрылымымен жер учаскелерін береді. Сондай-ақ «Ертіс» ӘКК 25 пайыздық үлестік қатысумен кіреді. Нұр-Сұлтан, Алматы және Қарағандыдан келген көптеген компаниялар осы жобаға бірінші болып қатысуға келісім білдірді. Кейбіреулер құрылысты бастап кетті,- деді облыс әкімі Даниал Ахметов.
Сонымен қатар ШҚО құрылыс басқармасы алдағы бес жылға арналған коммерциялық тұрғын үй құрылысының перспективалық жоспарын жасайды. Бұл ретте үлкен жұмыс тәжірибесі мен дәлелденген қаржылық жағдайы бар сенімді компаниялар ғана таңдалатын болады.
Бір айта кетерлігі, олар дайын типтік жобаларды қолдана алады. Өскемендегі Нұрлы жол және Спорт шағын аудандарында 34 тұрғын үйдің құрылысына ЖСҚ әзірленген. Жоспарда айналма жолдардың жанында құрылыс жүргізу, сондай-ақ облыстың басқа қалалары мен аудандарында коммерциялық тұрғын үй салу бар.
Тек облыс орталығында ғана 2025 жылға қарай үш миллион шаршы метрге жуық жаңа тұрғын үй салынады. 21-ші, 25-ші және 28-ші тұрғын аудандарда құрылыс қарқынды түрде жүргізілетін болады.
Сонымен қатар, кеңес барысында облыс әкімі айтып өткендей, «Бір қабатты Шығыс» мемлекеттік бағдарламасы бойынша құрылыс белсенді жүргізілуде. Семей, Риддер және Өскеменде, сондай-ақ облыс аудандарында жаңа үйлер пайдалануға берілді.
Әлібек КЕМЕЛХАН,
«Семей таңы»
