Nur Otan партиясының Семей қалалық филиалында Саяси кеңес бюросының отырысы өтті. Отырыста партияның қоғамдық қабылдауында Nur Otan партиясы депутаттық фракциясының Семей қаласы мәслихаты депутаттарының 2022 жылға арналған азаматтарды қабылдау кестесі қаралды.
Партияның Семей қаласындағы филиалының төрағасы Бақытжан Байахметов Семей қаласының аумағында ғана емес, сонымен қатар шалғайдағы ауылдық округтерде де тұрғындармен кездесулер ұйымдастыруға ерекше назар аударды.
— Семей қаласы мәслихаты депутаттарының Nur Otan партиясының депутаттық фракциясы кездесулері жаңа жылдың алғашқы күндерінде басталуы қажет. Қоғамдық қабылдау әкімдердің есеп беру кездесулеріне дейін өтуі тиіс. Осы есеп беру кездесулерінде тұрғындар өз мәселелерінің шешіліп жатқанын естіп, біздің нақты істер партиясы екендігімізге көздерін жеткізе алады, — деп атап өтті Бақытжан Байахметов.
Сондай-ақ Nur Otan партиясы Семей қалалық филиалы Саяси кеңесі бюросының отырысында бірден 9 кеңестің құрамы бекітілді. Бұл — партиялық бақылау комиссиясының; сыбайлас жемқорлыққа қарсы іс-қимыл жөніндегі қоғамдық кеңестің; өңірлік даму; экономиканы дамыту және кәсіпкерлікті қолдау; білім беру мен денсаулық сақтауды дамыту; әлеуметтік мәселелер; қоғамдық экологиялық кеңестің және жастарды қолдау жөніндегі қоғамдық кеңестің құрамы.
Отырыста Кеңес төрағасына және комиссия мүшелеріне үміткерлердің әрқайсысы жеке-жеке қаралды.
— Бұл өз ісін білетін сенімнен мамандар болуы тиіс. Негізгі талаптар — адамдармен жұмыс істей білу, партияны лайықты таныту, өзінің жеке үлгісі мен еңбек тәжірибесі арқылы қоғамда беделге ие болу,- деп атап өтті Nur Otan партиясы Семей қалалық филиалының төрағасы Бақытжан Байахметов.
Сондай-ақ партияның Саяси кеңесі бюросының мүшелері партияішілік тәртіпті нығайту мәселелерін талқылады. Негізгі шешімдерді қабылдау кезінде партия мүшелері қоғамдық дамудың маңызды мәселелері бойынша бір пікірде болуға тиіс екендігіне ерекше назар аударылды.
«СТ» — ақпарат
