Алыптар аламаны «Қазақстан барысы» атты ел Президентінің жүлдесіне арналған республикалық турниріне жуырда қалалық іріктеу жарысы өтті. Іріктеу жарысында кіл мықты деген 16 балуан бақтарын сынады.
Жарыстың ашылу салтанатында қалалық денешынықтыру және спорт бөлімінің басшысы Мұрат Құржықаев, ШҚО қазақ күресі федерациясының вице-президенті Амантай Хазымұлы және аталмыш жарыстың бас төрешісі, халық-аралық дәрежедегі төреші, қазақ күресінен ҚР еңбек сіңірген жаттықтырушы Шыңғыс Тұрсыновтар сөз алып, барлық балуанға сәттілік тіледі. Жарыс басталмас бұрын «Қазақстан барысы» және «Еуразия» барысы турнирлерінің қатысушысы, биылғы турнирдің үміткері, қазақ күресінен халықаралық дәрежедегі спорт шебері және әлем кубогінің иегері Мұхит Тұрсыновпен сұхбаттасқан едік.
— Қазір қызу жаттығу үстіндеміз. Мақсатымыз «Қазақстан барысына» және ел чемпионатына қатысу. Одан кейін Азия чемпионаты мен әлем чемпионаты күтіп тұр. Алайда, әзірге бабындамыз деп айтуға да болмас. Дайындығымыздың қаншалықты деңгейде екенін алдағы ел чемпионаты көрсетер. Дамылсыз дайындық қана биік белесті бағындырудың кепілі, — деген Мұхит, — Семейдің балуандарының қай-қайсысы болмасын, осал емес. Мысалы, Ерлан Конкеев, Ерлан Сапарғалиев, Мереке Тұрашев сынды балуандарды ерекше атап өтуге болады. Сонымен қатар, Әділ Оразбаев сияқты бауырларымыздың да бозкілемде өрісі кеңейіп келеді, — дейді.
{jcomments on}Әділ Оразбаев расымен де осал емес екен. 1995 жылы туылған Әділдің қазіргі салмағы 110 келі. Оның спортпен айналысып жүргеніне 7 жыл болса, осы уақыт ішінде қазақ күресінен және самбо мен дзюдодан спорт шебері, самбодан Қазақстан чемпионы атанған. Ал, қазақ күресіне бет бұрғанына 2 жылдай уақыт болған. «Мақсатым: «Қазақстан барысына» қатысу. Сол үшін барымды салып жүрмін. Әрине, үмітсіз шайтан. Дегенмен, алтын алмасам да, бастысы қатысқым келеді», — дейді Әділ.
Ал, қазақ күресінен халықаралық дәрежедегі спорт шебері, әлем чемпионатының күміс жүлдегері (2006 ж), Азия чемпионы (2007 ж) Ерлан Конкеев те Семей балуандарының ішінде орны бөлек, тәжірибелі спортшылардың бірі. Бозкілемде жүргеніне биыл 12 жыл болған. 18-ге толып, жігіт жасына жетіп барып, спортты кеш бастаса да, Ерлан жетістіктен кенже қалмаған. Енді «Қазақстан барысында» бағын сынап көрмек. Алайда, «күш атасын танымас» деген аталы сөз бекерге айтылмаса керек. Себебі, іріктеу жарысындағы финалдық кездесуде Ерлан Конкеев пен Әділ Оразбаев белдесіп, нәтижесінде Ерлан інісіне жол беріп алды. Жалпы, жарыс қорытындысы бойынша бұл жұп ІІ және ІІІ орындарды өзара бөлісті. Ал, І орынды қанжығаға байлаған Мұхит Тұрсынов «Семей барысы» атанды. Бұл үздік үштік 10-12 мамыр аралығында Өскеменде өтетін облыстық іріктеу жарысына жолдама алды. Ол жарысқа Шығыс өңірінің барлық аудандарынан құрыш білекті, апайтөс балуандар сынға түспек. Солардың ішінен іріктеліп, жаурыны жер иіскемей, шашасына шаң жұқтырмаған 2 балуан ғана 29 маусым күні Астана төрінде өтетін республикалық «Қазақстан барысы» турнирінде Шығыстың намысын қорғамақ. Ал, былтырғы жылы «Қазақстан барысы» атанған жерлесіміз Айбек Нұғмаров биылғы турнирге еш іріктеусіз қатысуға жолдама алған болатын. Ұлттық рухымызды асқақтататын бәсі мықты байрақты бәсекеде бақ сынайтын Шығыстың шымыр балуандары жеңіс тұғырынан көрінсін деп тілейміз.
Нұрдәулет КӘКІШЕВ, «Семей таңы».
