Балаларға базарлық
Шығыс Қазақстан облысында 200 балаға Президент атынан жаңа жылдық сыйлық берілді. Жаңа жыл мерекесі қарсаңында балаларға облыс әкімінің атынан да сыйлықтар табыс етілді. Эпидемиологиялық жағдайға байланысты екінші жыл қатарынан жаңа жылдық шырша концертсіз өтті.
Шыршатойға 9-13 жас аралығындағы 450 бала қатысты. Олардың қатарында ерекше білім беруді қажет ететін балалар, аз қамтылған және көп балалы отбасылардан шыққан және үздік оқитын, сонымен қатар спортта, шығармашылықта жетістікке жеткен дарынды оқушылар бар. 200 балаға Қасым-Жомарт Тоқаевтың атынан, 250 балаға Даниал Ахметовтің атынан сыйлықтар тапсырылды.
— Сыйлық алғаныма өте қуаныштымын. Барлық туған-туыстарым мен құрбыларымды келе жатқан Жаңа жыл мерекесімен шын жүректен құттықтаймын! Аңсаған армандарыңызға жетіңіздер!» — дейді «Ақ ниет» мектеп-интернатының он бір жасар оқушысы Рита Мышеловская.
Президенттік шыршаның әрбір қатысушысы Жаңа жылға арналған ноутбук, дәстүрлі тәтті сыйлық және балаларға арналған «Киелі география» кітабын алды. Балалар мерекеге өте жақсы дайындықпен келген, олар түрлі сайыстарға белсене қатысып, ән айтып, өлең оқыды.
— Өңірде білімді ұрпақ тәрбиесіне барлық жағдай жасалуда, өйткені болашақ біздің балаларымызда. Біз IT-сыныптар аштық, форумдар мен хакатондар өткізудеміз, жаңа спорттық және мәдени нысандар бой көтеріп, әрбір баланың бойындағы дарындылықты байқау үшін түрлі үйірмелер мен секциялар жұмыс жүргізіп отыр. Біздің балаларымыз үлкен жетістіктерге жететініне сенімдімін, өйткені олардың айқын мақсаты бар! Балаларды және олардың ата-аналарын келе жатқан Жаңа жылмен шын жүректен құттықтаймын! Барлықтарыңызға денсаулық, бақыт, бейбітшілік пен амандық тілеймін! Мереке құтты болсын! — деп жазды Даниал Кенжетайұлы өзінің фейсбук әлеуметтік желісіндегі жеке парақшасында.
Өз тілшіміз
