Өткен жұма, 24 желтоқсан күні қала әкімі Бақытжан Байахметов Крестьянская көшесінің тұрғындарымен кездесті. Тұрғындардың айтуынша, аталмыш көшеде көп жылдар бойы жарық болмаған.
Бұл көшеде №7 мектеп-лицей орналасқан, ал жарықтың болмауы мектептен кеш қайтатын оқушылар үшін қауіпті екені белгілі. Сонымен қатар жылдамдықты шектен тыс асырып жіберетін жүргізушілер де бар. Тұрғындар тілегін ескерген қала әкімі Бақытжан Байахметов жуырда бұл көшеге жарық орнаттырды.
Қала әкімімен кездесу барысында тұрғындар екі мәселе көтерді. Оның бірі – балалар ойын алаңының жоқтығы. Үш көп қабатты тұрғын үй және мектеп орналасқан көшедегі екі әткеншек жеткіліксіз. Қала әкімі бұл ұсынысты келесі жылға арналған жоспарға енгізетінін жеткізді.
— 2022 жылы 13 аулада ойын алаңын жабдықтау жоспарланған. Бюджетке қарай, біз аула санын көбейтуге тырысамыз. Биыл тек үш аула абаттандырылып, ойын алаңдары жасалды,- деді қала әкімі Б.Байахметов.
Тұрғындар көтерген екінші мәселе — асфальтталмаған жол мәселесі.
— Бұл — қала үшін өзекті мәселе. Өйткені жолдардың 60 пайызы қанағаттанарлықсыз жағдайда. Биыл біз 30 шақырым жолды асфальттасақ, келесі жылы 64 шақырым жолды асфальттауды жоспарлап отырмыз. Крестьянская көшесін келесі жылғы жоспарға енгіземіз,- деді қала әкімі тұрғындармен кездесу барысында.
«СТ»-ақпарат
