Логотип Тәуелсіздікке 30 жыл
Шығыс Қазақстан облысында ел Тәуелсіздігінің 30 жылдығы кең көлемде аталып өтті. Аймақтағы барлық аудандар мен қалаларда мерекелік шаралар ұйымдастырылып, жаңа нысандар пайдалануға берілді. Сонымен қатар ел егемендігінің мерейтойын арқау еткен мәдени шаралар да өткізілді.
Мереке қарсаңында барлық қалалар мен аудандарда әлеуметтік нысандардың салтанатты ашылуы, аймақтың дамуына зор үлес қосқан азаматтарды марапаттау рәсімдері өтті.
Алтай ауданының орталығында ҚР Тәуелсіздігінің 30 жылдығына орай балалар кітапханасы ашылды. Мұнда балалардың шығармашылығын дамытуға, танымдық қызығушылықтарын арттыруға мүмкіндіктер жасалған.
Ал Ұлан ауданы Герасимовка ауылында екі бірдей нысан ашылды. Ауыл тұрғындарының игілігіне жаңа балабақша пайдалануға берілді. Сондай-ақ ауылда 400-ден астам ауланы таза ауыз сумен қамтамасыз ететін орталық су құбыры іске қосылды. Жоба «Ауыл – Ел бесігі» бағдарламасы бойынша жүзеге асырылған.
Ұлан ауданының Сағыр ауылында отбасылық-дәрігерлік амбулатория ашылды. 1981 жылы салынған бұрынғы фельдшерлік-акушерлік пункт ғимараты 90 млн теңгеге жөнделіп, жаңа жиһаздармен, медициналық жабдықтармен қамтамасыз етілген.
Ал Жарма ауданында қуаты 30 МВт-ты құрайтын жел электр станциясы іске қосылды. Бүгінде бұл – жаңартылатын энергия көздерін дамытуға бағытталған «жасыл экономиканың» ең ірі жобаларының бірі саналады. Аталмыш шараға Жарма ауданының әкімі Ахметқали Нұрғожин арнайы қатысып, жаңа нысанның лентасын салтанатты түрде қиды.
Бесқарағай ауданында Ұлы Отан соғысы жауынгерлері мен батырларының, Ауған соғысы ардагерлерінің құрметіне Батырлар аллеясы ашылды.
Көкпекті ауданының Самар ауылында «Ауыл – Ел бесігі» бағдарламасы аясында салынған дене шынықтыру-сауықтыру кешенінің салтанатты ашылуы өтті. Ал Үлкенбөкен және Сарыбел ауылдарында шағын футбол алаңдары ашылды.
Жалпы, ҚР Тәуелсіздігінің 30 жылдығына орай, Шығыс Қазақстанда барлығы 140-тан астам іс-шара өтіп, 65 жаңа нысан тұрғындарға есігін айқара ашыпты.
Ел Тәуелсіздігінің 30 жылдық мерейтойына орай ел шығысында мәдени шаралар да көптеп өткізілді. Мәселен, облыс орталығы Өскемен мен Семей қалаларында көрмелер ұйымдастырылды. Семей шаһарындағы Ф.М.Достоевский атындағы музейде павлодарлық суретші В.Поликарповтың «Родительница степь» атты көрмесі өтті. Экспозицияға суретшінің қазақ даласының сұлулығын бейнелейтін оннан астам туындылары қойылған.
Ал Невзоровтар отбасы атындағы музейде келушілердің назарына 40 суретшінің картиналары ұсынылды. Оның ішінде пейзаждар, портреттер, натюрморттар, иллюстрациялар, тарихи-тақырыптық композициялар бар. Жиналған жұрт кескіндеме, графика, мүсін және инсталляция өнері туындыларын тамашалады.
Абайдың «Жидебай – Бөрілі» мемлекеттік тарихи-мәдени және әдеби-мемориалдық музейінде ұйымдастырылған көрменің тақырыбы «Тәуелсіздік – ел бақыты» деп аталды. Көрменің ашылуына қала әкімі Бақытжан Байахметов қатысып, жиналғандарды жалпыұлттық мерекемен құттықтады.
Әлібек КЕМЕЛХАН,
«Семей таңы»
