Семейде Тәуелсіздік күні қарсаңында 20 отбасы қоныс тойын тойлады. Пәтерлер «Бір қабатты Шығыс» бағдарламасы аясында берілді.
Ұшақтар жаңа шағын ауданында алаңы 85 шаршы метрді құрайтын жаңа үш бөлмелі баспаналар 16 көп балалы және 4 әлеуметтік осал топқа жататын отбасыларға берілді.
— Қазақстан Республикасының Тәуелсіздік күні – мемлекетіміз үшін ерекше күн. Бұл күн пәтер алған тұрғындардың есінде ерекше сақталатыны сөзсіз. Жаңа әрі кең үйде тұру – әр адамның арманы. Бүгін армандарыңыз шындыққа айналып отыр. Облыс әкімі Даниал Кенжетайұлының бастамасымен былтыр аймағымызда «Бір қабатты Шығыс» бағдарламасы іске асырыла бастады. Аталған бағдарлама аясында Семейде өткен жылы 10 пәтер салынса, биыл 105 пәтерден тұратын 25 үй салынды. Оның ішінде, 40 пәтер Ұшақтар шағын ауданында, қалғандары Комсомол кентінде. Қоныстарыңыз құтты болсын,- деді Бақытжан Байахметов.
Семейде биыл пәтер кілттері бірінші рет тапсырылып отырған жоқ. Осыған дейін «Бақытты отбасы» бағдарламасы бойынша Қарағайлы шағын ауданында 65 отбасы баспанамен қамтылды. Аталған бағдарлама аясында 100 жанұя екінші нарықтағы үйлерді алды. Сондай-ақ «Шаңырақ» және «Әскери баспана» бағдарламасымен 25 пәтер пайдалануға берілді. Жыл басынан бері 75 отбасы мемлекет есебінен 1 миллион теңге көлемінде тұрғын үй сертификаттарын алды. Осы жылы барлығы 292 отбасы пәтерге ие болды.
Бүгінде Семей қаласында тұрғын үй алу үшін 12 мың 500 адам кезекте тұр. Оның 1034-і – көп балалы отбасылар, 4377-сі — әлеуметтік осал топтарға жататын отбасылар және 1682-сі — жетім балалар. Жылдың соңына дейін тағы 40 отбасы жаңа баспаналы болады деп күтілуде.
Айта кетейік, Семейде соңғы жылдары тұрғын үй құрылысы қарқынды дамуда. 2022 жылдың бірінші жарты жылдығында Қарағайлы шағын ауданында 128 пәтер 32 көп балалы отбасыға, 25 жетім балаға және 71 халықтың әлеуметтік осал тобына жататын азаматтарға беріледі.
Семей қалалық ішкі саясат бөлімі
