Абаттандыру
Семей қаласындағы тұрғындардың сүйікті демалыс орындарының бірі Жамақаев скверінде жарықтандыру жүйесі жаңғыртылды.
Скверде ойын алаңдары, спорттық тренажерлер, тарихи ескерткіштер бар. Көше бойында түрлі оқу орындары, музыка мектебі, Қалалық Мәдениет сарайы орналасқан. Мұнда әсіресе қала жастары көп келеді.
Саябақта 15 жылдан аса уақыт бойы толық жарықтандыру болмаған. Қарапайым шамдардың жарығы әлсіз болды. Бұған дейін қаланы аралау барысында Семей қаласының әкімі Бақытжан Байахметов саябақтағы түнгі жарықтандыруды ретке келтіріп, қуатын арттыру туралы тапсырма берген болатын.
«Жүргізілген жұмыстардың нәтижесінде Шәкәрім даңғылынан Қайым Мұхамедханов көшесіне дейінгі сквердің бойы түнгі уақытта самаладай жарқырап тұр. Енді скверде серуендеу тұрғындар үшін бұрынғыдан ыңғайлы әрі қауіпсіз. Шамдардың жарығы адамға мерекелік көңіл-күй сыйлайды. Көше бойында бірқатар оқу орындары, мектептер мен балабақша орналасқандықтан, мұнда жүретін халық көп. Сондықтан біз уақыт талаптарын ескеріп, тұрғындарымыз үшін демалуға жайлы жағдайлар жасауымыз керек», — деді атқарылған жұмыстармен танысқан Бақытжан Байахметов.
Жалпы, скверге 100-ге жуық шам орнатылып, 2 шақырым кабель тартылған. Жарық диодты шамдар жаяу жүргіншілер жолдарының бойында ғана емес, сонымен қатар сквердің басқа жерлерінде де орнатылды. Бұл қала тұрғындарының демалуына жайлы жағдай туғызады.
Алдағы уақытта скверде абаттандыру, бұтақтарды кесу, қар тазалау секілді жұмыстар жалғасады.
Семей қалалық ішкі саясат бөлімінің ақпараты негізінде әзірленді
