Кәсіби мереке
Қалалық Мәдениет сарайында Ауыл шаруашылығы қызметкерлерінің кәсіби мерекесіне орай салтанатты жиын өтті. Мерекелік шараға ауыл шаруашылық саласы еңбеккерлері мен ардагерлері және жергілікті билік өкілдері қатысты.
Бақытжан Кәкенқажыұлының айтуынша, ағымдағы жылдың 10 айында ауыл шаруашылығының жалпы өнім көлемі 43,6 млрд теңгені құрап, 2020 жылдың сәйкес кезеңімен салыстырғанда шамамен 30 пайызға өскен. Бұл туралы Семей қаласының әкімі Бақытжан Байахметовтің Ауыл шаруашылығы қызметкерлерінің кәсіби мерекесіне арналған баяндамасында айтылды.
Семей қаласының әкімі өңірдің аграрлық саладағы жоғары экономикалық көрсеткіштерін атап өтті. Ауыл шаруашылығының нақты көлем индексі 103,4 пайызды құрады. 2021 жылғы қаңтар-қазанда ауыл шаруашылығының негізгі капиталына инвестициялар 958,7 млн теңгеге, немесе 2020 жылғы деңгеймен салыстырғанда 324,8 пайызға жетті.
Ауылшаруашылық дақылдарының барлық түрлерінің шығымдылығы, оның ішінде дәнді дақылдар 30 пайызға, майлы дақылдар 16 пайызға, картоп 20 пайызға, көкөністер мен бақша дақылдары 14 пайызға өсті.
Ауыл шаруашылығы дақылдарынан жоғары өнім алудың арқасында 10 айда өсімдік шаруашылығының жалпы ішкі өнімі 25323,6 млн теңгені құрады, бұл өткен жылғы көрсеткіштерден айтарлықтай жоғары.
Жыл басынан бері 7,9 млрд теңге сомасына 3 инвестициялық жоба — өсімдік майын өндіру бойынша май экстрациялық зауытының құрылысы, «SEMEI QUS» ЖШС тауарлық жұмыртқа шығару және «Приречное» агрофирмасында қосымша 5 жаңбырлатқыш агрегат орнату пайдалануға берілді.
2021 жылдың 10 айында ауыл шаруашылығын дамытуды қолдауға 1816,5 млн теңге субсидия бөлінді.
— Біз сіздердің еңбектеріңізді мақтан тұтамыз. Біздің құнарлы жерімізде өсірілетін өнімдер бүкіл Қазақстанға танымал! Әрине, ел Үкіметінің аграрлық секторды дамытуға бағытталған күш-жігері өз жемісін беруде. Ауыл еңбеккерлеріне өз әлеуетін іске асыруға мүмкіндік мол. Сіздерге зор денсаулық, бақыт және халқымыздың, Отанымыздың игілігі жолындағы еңбектеріңізге жоғары жетістіктер тілеймін!- деп Бақытжан Байахметов ауыл шаруашылығы саласы ардагерлері мен еңбеккерлерін төл мерекелерімен құттықтады.
Салтанатты жиында еңбегімен ерекшеленген сала қызметкерлері марапаттарға ие болды.
Ауыл шаруашылығы министрлігінің «Еңбек ардагері» медалімен «Балабек» шаруа қожалығының басшысы Аманжол Суықбаев марапатталды. Семей қаласы әкімінің грамоталары «Восток бройлер» ЖШС директоры Төлеужан Жексембаев, «Семей құс» ЖШС директоры Марат Анаев, «Кондиз» ЖШС директорының орынбасары Әділбек Акимов, қалалық ауыл шаруашылығы бөлімінің бас маманы Гүлжан Тасыбаева, Қараөлең ауылдық округінің «Мендеке» шаруа қожалығының басшысы Тәңірберген Тұрысбеков және тағы басқа сала мамандарына салтанатты түрде табыс етілді.
Ал Семей қаласы әкімінің aлғыс хатымен Озерки ауылдық округіндегі «Баршын» шаруа қожалығының басшысы Наиль Козлов, «Приречное» агрофермасының жүргізушісі Иван Золотухин және басқалар марапатталды.
Агроөнеркәсіп кешені қызметкерлерінің құрметіне арналған салтанатты жиын мерекелік концерттік бағдарламамен аяқталды.
