Халықаралық Еріктілер күні
Халықаралық Еріктілер күні қарсаңында, 3 желтоқсан күні, Абай кітапханасында ел Тәуелсіздігінің 30 жылдығына орай, техникалық және кәсіптік бағытта білім беру студенттері арасында халықаралық ұйымдардың қатысуымен «Ашық жүрек» атты волонтерлер слеті өтті. Слетке еліміздің өзге қалалары мен көрші мемлекеттердің волонтерлері онлайн форматта қатысты.
Халықаралық Еріктілер күні қарсаңында «Авиценна» жоғары медициналық колледжінің ұйымдастыруымен өткен волонтерлер слетіне 80-нен астам ұйым қатысты. Слетті ұйымдастырушылардың мақсаты — еріктілердің үздік тәжірибелерімен алмасу, диалог алаңын ұйымдастыру, еріктілер қозғалысын насихаттау.
Шараға Великий Новгород қаласынан Я.Мудрый атындағы Новгород мемлекеттік университеті жанындағы медициналық колледж, Санкт-Петербург қаласынан В.М.Бехтерев атындағы Санкт-Петербург мемлекеттік бюджеттік кәсіптік білім беру мекемесі, Минск қаласындағы Беларусь мемлекеттік медициналық колледжі, Витебск қаласынан академик И.П.Антонов атындағы Витебск мемлекеттік медициналық колледжі және басқа да білім мекемелерінің волонтер студенттері Zoom платформасы арқылы қатысып, тәжірибелерімен бөлісті.
— Қала әкімі атынан барлықтарыңызды волонтерлер слетінің ашылумен құттықтаймын! Бүгін, 3 желтоқсан – Халықаралық мүгедектер күнінде бас қосып отырғанымыз тегін емес. Себебі олар Сіздердің қамқорлықтарыңызды қажет ететін қоғамымыздың ерекше тобы. Осында отырған барлықтарыңызды мейірімділік, қайырымдылық, ашықтық, гуманизм сияқты ортақ қасиеттер біріктіреді. Кез келген қоғам еріктілерге мұқтаж. Сіздердің қажырлы да қайтарымсыз еңбектеріңіз мемлекетімізді жаңа деңгейге көтереді,- деді қала әкімінің орынбасары Айдар Садырбаев.
«Авиценна» жоғары медициналық колледжі директорының оқу ісі жөніндегі орынбасары Динара Ахметова да волонтерлерді құттықтап, слет жұмысына сәттілік тіледі.
Слет барысында еріктілер өзара тәжірибе алмасып, алдағы жұмыс бағытын белгіледі.
Осы күні қаламыздың үздік эко-еріктілері Балалар мен жасөспірімдердің шығармашылық сарайында бас қосты. Оларға ҚР Экология, геология және табиғи ресурстар министрлігінің және қала әкімі Бақытжан Байахметовтің алғыс хаттары мен сыйлықтары табыс етілді.
Марапаттау кешінде қаладағы «Жанұя орталығы» қоғамдық қорының президенті Жанна Жибраева экологиялық білім беруге баса көңіл бөлу қажет екенін атап өтті.
– Ел Президенті волонтерлер қозғалысы туралы аз айтып жүрген жоқ. Мемлекет басшысының атап көрсеткен бір саласы – эковолонтерлік. Табиғатты қорғау ХХІ ғасырдағы ең өзекті мәселелердің бірі болып отыр. Оқушыларға экологиялық білім беруді арттыруымыз керек. Бұл салада жұмыстар атқарылып жатыр. Дегенмен жеткіліксіз. Үлкендердің өзі экологияны қорғауға бейжай қарайды. Балалар арқылы, жастар арқылы біз ересектерге әсер ете аламыз деп ойлаймын. Айта кетейін, жуырда біздің ұйымдастыруымызбен мүмкіндігі шектеулі балаларға арналған экотерапиялық кабинет ашылады,- деді Жанна Жибраева.
Шара барысында «Исток» қоғамдық қорының директоры Людмила Михайлова, «Жанұя орталығы» қоғамдық қорының атқарушы директоры Людмила Асташкина, «Ертіс» өлкетану қоғамының негізін қалаушы Павел Жуков және басқа да еріктілер «Алтын жүрек» аталымымен марапатталды. Сондай-ақ белсенді қала тұрғындарына да алғыс хаттар пен шағын сыйлықтар табыс етілді.
А.САМАТОВА,
«Семей таңы»
