Қалалық әкімдікте
22 қараша күні Семей қалалық әкімдігінде қала басшысы Бақытжан Байахметов бөлім басшыларының қатысуымен селекторлық жиын өткізді.
Жиын барысында сәулет және қала құрылысы бөлімінің басшысы Ардақ Исатаевтың, ТҮКШ және тұрғын үй инспекциясы бөлімінің басшысы Амантай Өтелбаевтың баяндамалары тыңдалды.
— Сәулет және қала құрылысы бөлімі суретшілермен және сәулетшілермен бірлесіп, қаланы безендіру және жарықтандыру бойынша жобалар әзірлеуде. Қала көшелерін қысқы безендіру жұмыстары ҚР Тәуелсіздігінің 30 жылдығына және Жаңа жыл мерекесіне орай жүргізіледі. Қысқы безендіру және түнгі жарықтандыру Бозтаев, Глинки, Әуезов даңғылы, Шәкәрім даңғылы, Қайым Мұхамедханов, Қабанбай батыр, Қабылбаев, Абай, Гагарин көшелерінде және айналма жолайрығынан Шугаев көшесіне дейінгі аралықта, ішінара Сәтбаев көшесінде, қаланың Орталық алаңы жанында орналасқан ғимараттарда, Әуезов атындағы алаңда, сондай-ақ саябақтар мен арбатта жүргізу туралы эскиздік жобалар әзірленді. Нобайлық жобалау жұмыстары аяқталғаннан кейін ТҮКШ бөлімімен бірлесіп жобалық-сметалық құжаттама жасалады. Кәсіпкерлік бөліммен бірге жоғарыда аталған коммерциялық нысандарды аралап, кәсіпкерлерге ғимараттарды жарықтандыру, қысқы кезеңге дайындық туралы және жұмыс мерзімі көрсетілген хабарламалар беріледі. Жұмыстар барысын қадағалау үшін 6-13 желтоқсан аралығында бақылау жұмыстарын жүргіземіз,- деді сәулет және қала құрылысы бөлімінің басшысы Ардақ Исатаев.
Қала әкімі бөлім басшысының есебін тыңдаған соң жобаны жүзеге асыруға уақыттың тым тапшы екенін айтып, ескерту жасады.
— Жобалық-сметалық құжаттарды дайындауға бір ай, конкурус өткізуге бір ай уақыт кетеді. Мемлекеттік қызметкердің бұл туралы білмеуі мүмкін емес. Алдымызда үлкен мереке – ел Тәуелсіздігінің 30 жылдығы және ҚР Тұңғыш Президенті күні күтіп тұр. Мен Сіздің таныстырылымыңыздан Тәуелсіздік күніне арналған ешқандай жоба көріп тұрған жоқпын. Басты мерекені ұмыт қалдырып отырсыздар. Уақыт тым аз қалды, бұл жобаларды қалай жүзеге асырмақсыздар? – деді бөлім басшысының дайындық жұмыстарына көңілі толмаған қала әкімі.
Бақытжан Кәкенқажыұлы сонымен қатар тиісті бөлім басшыларына Тәуелсіздік күніне арналған идеологиялық жоспарларды іске асыруды тапсырды.
Жиын барысында қаланың қысқа дайындық барысы туралы ТҮКШ және тұрғын үй инспекциясы бөлімінің басшысы Амантай Өтелбаев баяндады.
Жиын соңында Бақытжан Кәкенқажыұлы орынбасарлары мен бөлім басшыларына жұмыстарына жауапкершілікпен қарауды талап етіп, тапсырмалар берді.
А.САМАТОВА,
«Семей таңы»
